ïoh kem ki Pulit ka Ri Bhoi ïa 2 ngut kiba thmu khaïi Ganja, kurup 3 kilo naka pla ba thmu rah sha Nongpoh

Nongpoh, Nailur 06 : Ka jingthmu ki 2 ngut ban shalan beaiñ ïa u Ganja ka la shu pulom noh, kaba dei hadien ba ki 2 ngut katba dang wan phai na Shillong lyngba kawei ka Tata Sumo kaba don ïa u number ML10D5684 ban hiar sha ka thaiñ Nongpoh ki la shah kem noh ha ki Pulit ka Ri Bhoi.
Kane ka jingioh kem ki Pulit ïa kitei ki 2 ngut ba la suba ba ki don kti ha kaba shalan beaiñ ïa u Ganja, ka dei hadien ba la ai jingtip da ka KSU North Khasi Hills District Unit, ha kaba ki pulit ka Ri Bhoi ki la pynap shrip ïa kitei ki 2 ngut ha ka surokbah National Highway-6 ba hap ha ki bynta ka Umtrew ha ka thaiñ Umsning.
Kine ki 2 ngut kiba la ioh kem da ki Pulit la tip kyrteng kum u Bobystar Kharbani, 23 snem ka rta uba shong ba sah ha ka shnong Pahamsyiem bad uwei pat la tip kyrteng kum u Patrick Lyngdoh, 33 snem ka rta naka shnong Mawroh.
Ki Pulit ka Ri Bhoi ha ka jingioh bat ïa katei ka Tata Sumo ki la pynlong ïa ka jingtalasi na kitei ki 2 ngut bad na ka pla jong u Bobystar Kharbani ki Pulit ki la ioh ban kurup haduh 66 song u Ganja bad la don ka jingkhia haduh 3 kilo, ha kaba la kynnoh ba ki thmu ban pynïaid iew ïa une u Ganja sha ka thaiñ Nongpoh.
Halor kane ka jingioh kurup ïa u Ganja, na ka liang ki Pulit ka Ri Bhoi ki la kem noh ïa u Bobystar Kharbani bad u paralok jong u kaba dei halor kane ka jingioh kurup Ganja bad ki la pyngngat ruh ïa ki katkum ka kyndon jong ka Narcotic Drug and Psychotropic Substances (NDPS) Act, 1985. Ban tih bniah halor kane ka jingioh kurup Ganja, ka jingtohkit ïa kine ki 2 ngut ruh ka dang ïaid shaphrang.