Ïoh kem ki BSF ïa arngut ki kynthei ha ryngkat ki Yaba tablet na South West KHD

Mawkyrwat, Ïaïong 04: Kum shibynta ban ïakhun ban pynlong ïa ka thaiñ kaba lait na u drok, ki Border Security Force (BSF) Meghalaya, ha ka 3 tarik u Ïaïong, 2022, ha ryngkat ka jingïatreilang bad ki pulit ka Meghalaya, hadien ba ki la ïoh jingtip ba thikna bha, ki la ïoh ban kem noh napoh South West Khasi Hills District ïa ar ngut ki kynthei ha ryngkat 1790 tylli ki Yaba tablet.
Ha ka kyrwoh khubor na ka BSF, la ong ba ïa kitei ki mar beaiñ la ïoh kurup noh katba kitei ki kynthei ki dang ïaid dang ïeng hajan ka khappud bar ri kaba hap hapoh ka jingkhmih jong ka BSF BOP Karaigora jong ka 193 Bn BSF. Kitei ki kynthei ba la shah kem ki la phla ba uwei u briew u bym tip kyrteng uba dei u nong India hi u la phah ïa ki ban kawang ïa ki song kuli Yaba najrong ka jingker sainar khappud sha Bangladesh. Ïa kitei ki kynthei la tip kum ka Jasmine Sangma(45) bad ka Ritima Sangma (40) kiba dei ki nongshong shnong jong ka Bholabita, East Khasi Hills District.
Ïa kitei ki kynthei la aiti noh shapoh Gumaghat Police Outpost, South West Khasi Hills District, bad la ujor FIR pyrshah ïa kitei ki ar ngut. Ka jingtohkit halor kane ka dang ïaid shakhmat.
Ha kawei pat ka tyllong khubor, ki BSF jong ka BOP Umsyiem, ha ka 2 tarik u Ïaïong, 2022, ki la ïoh bat noh ïa kawei ka kynthei nong Bangladesh kaba wan ïaid sha ki bynta khappud bad la kum jam sha jaka India.
Katei ka kynthei ka la ïathuh ba kam don jingtip ba ka la kum jam sha jaka India bad ka khlem da mut khnang ban leh kumta. Ïa katei ka kynthei la tip kum ka Maryam (55) kaba na Mymensingh district, Bangladesh.
Kumta kum ka dak ban pyni ïa ka jingïasngew jan, ki BSF ki la aiti noh ïa katei ka kynthei sha ki Border Guard Bangladesh (BGB).
Ki BGB ki la pynpaw ka jingïaroh ïa katei ka jingleh jong ki BSF ha ka jingïakynduh hapdeng jong ki ha ka por ba ki aiti noh ïa katei ka kynthei.