ïoh kem im ki paidbah ïa u Ramesh Dkhar na Muthlong, aiti sha ki Pulit ka WJH

Shillong/Jowai, Nailur, 12: Shi sngi hadien ba u Ramesh Dkhar u la lait thaw da ka said ban shah bom ïap ha ki paidbhur ha ka shnong Shangpung, West Jaiñtia Hills District ha ka Sngi u Blei, ki Pulit ki la kem ïoh ïa une u runar ba la lait pheit na phatok ha ka Lah Sngi u Blei ha ka por shiteng sngi.
U Superintendent of Police ka West Jaiñtia Hills District u BD Marak haba pynthikna ïa kane, u la ong ba ïa u Ramesh Dkhar la lap da ki katto katne ki briew ha ka shnong Muthlong bad mar mar ki la pyntip sha ki Pulit, kiba la leit kyrkieh ban shimti noh ïa u khnang ban ïada na kano kano ka jingjia kaba sngewsih.
Lyngba ka Video ba la saphriang ha ka rynsan jong ka Social Media, la ïohi ba ki paidbah ki la shu kem im ïa une u runar khlem kano kano ka jingbom jingtied kumba la jia ïa ki saw ngut kiwei pat.
Kum ban shu pyntip hangne ba ki saw ngut ki runar ba dang don hapdeng ka jingshah tian bishar ki la shah bom ïap ha ki paidbhur ha ka Sngi u Blei ha ka jaka khlaw kaba don ha khappud jong ka shnong Muthong bad ka shnong Shangpung. Ki saw ngut kiba la shah bom ïap ki kynthup ïa u I Love You Talang, u Lodestar Tang, u Shidorki Dkhar bad u Marsanki Tariang.
U Rikmenlang Lamare u bym don lang bad ka kynhun u I Love You u la lait thaw na kane ka jingjia ba sngewsih.
Ka Ophis jong u Deputy Commissioner ka West Jaiñtia Hills District lyngba u Additional District Magistrate u P.Kr. Boro, ha ka lah sngi u Blei ka la pynmih da ka jingpynbna ban pyntip sha kino kino ki briew, ki riewshimet, ki kynhun bad ki Rangbah Shnong kiba kwah ban ai sakhi ha kaba ïadei bad ka jingkynnoh bom ïap ïa ki saw ngut ki runar ba la lait phet na Jowai District Jail kaba la jia ha ka 11 tarik u Nailur, 2022 kiba kynthup ïa u I Love You Talang, u Lodestar Tang, u Shidorki Dkhar bad u Marsanki Tariang ha ka shnong Nongrim, Shangpung Khliehmuchut.
Lyngba kane ka jingpynbna, ka Ophis u Deputy Commissioner ka la pyntip ba ki paidbah ki lah ban wan hi da lade ha ki kynta treikam naduh ka 12 tarik haduh ka 16 tarik u Nailur, 2022 ha ka ophis treikam jong u Additional District Magistrate u P.Kr. Boro ha ka kamra kaba 120 (ha ka mala kaba nyngkong) ban shim ïa ki jingkren bad ki sakhi ha kaba ïadei bad kane ka jingjia.