Jowai Nailur 06: Ka Jaiñtia Fishing And Environmental Protection Association (JF&EPA) Jowai, lyngba ka jingïarap ki samla shnong, ryngkat ruh da ka jingshimkhia ka Dorbar Shnong Khimusniang Jowai, ka la ïoh kem ïa arngut ki briew kiba kyrteng u Warsingh Kurbah, na ka Shnong Mawsawa, Mairang bad u Nalki Phawa, na ka shnong Nongjngi, Loomlyngkut, kiba la riam jar dohkha ha ka wah Myntdu ha ki bynta sharum ka jingkieng Nar (Mulieh) ha ka 12 tarik August 2022 ha ka por 7 PM. Ka jaka ba hap hapoh u pud u sam ka Dorbar Shnong Khimusniang (DSK) Jowai.
Ïa ki tei ki briew arngut, ha ryngkat ki jar riam dohkha, la rah ha ka Hall ka Dorbar Shnong, ban shim jingtohkit kaba bniah. Ha ka jingtohkit, kine ki briew ki la phla, ba ki la leh ïa ka tei ka kam riam jar dohkha da bun bun sien. Hadien ka jinglap sabut kaba biang, ka Dorbar Shnong Khimusniang, ka la phah ïa katei ka kam sha ka Jaiñtia Fishing And Environmental Protection Association Jowai, kaba dei kawei na ki seng ba paw bha, ha ka jingthmu ban pynneh pynsah, ïa ki dohkha dohpnat kiba im ha ka wah Myntdu.
Ka JF&EPA, Jowai, ka la shim bishar ïa kitei ki briew, bad ki la phla ba ki la leh ïa katei ka kam riam jar dohkha, kumba ki la phla ha khmat ka Dorbar Shnong Khimusniang. Kumta ka JF&EPA ka la daiñ kuna ïa kitei ki briew, katkum ki kyndon trei kam ka seng, da ka ba ki hap ban siew ïa ka kuna ba Rs 5000 (san hajar) tyngka marwei.
Ka JF&EPA, ka ai khublei kyrpang ïa ki samla ka Shnong Khimusniang bad ïa ka Dorbar Shnong Khimusniang baroh kawei, na ka bynta ka jingiatrei lang jong phi bad ka seng.
Ha ka jingïadei bad ki kam pynïap dusmon ïa ki dohkha dohpnat ha ka wah Myntdu, da ka ba Riam jar, siat bom dynamite, bret jar, tong sasi, beh kyngum, Ai dawai bih bad kiwei kiwei ki rukom pynïap pathar ïa ki dohkha ha ka wah Myntdu, ka seng ka la khang pyrshah, la katto katne snem ym duna ïa ka 29 snem, lait noh tang da kaba khwai.
La kyrpad ïa baroh ki nongshong Shnong hapoh ka Shnong Jowai, ba phin snhewbha ban ïa trei lang bad ka seng, na ka bynta kane ka jingthmu ban pynneh pynsah ïa ki dohkha dohpnat ha ka wah Myntdu , khnang ba kan long kawah kaba im, la ïathuh ka kyrwoh khubor na u D. H. Pde, President bad u M. Challam Gent Secretary ka seng JF&EPA Jowai.
