Ïoh ka UDP Ranikor Circle ïa ki nongkitkam jong ka Youths Wing, shen yn sa pynskhem

Mawkyrwat, ‘Naitung, 31: Ka United Democratic Party (UDP) jong ka Ranikor Circle mynta ka sngi ka 30 tarik u ‘Naitung, 2022 ka la ïoh ban jied ïa ki nongkitkam jong ka UDP Youths Wing bad ïa ka jingïalang la pynlong hapoh jong ka Dorbar Hall jong ka shnong Rangthong, South West Khasi Hills District ha kaba u bah Pius Marweiñ, u nongmihkhmat jong ka Ranikor Constituency u la long kum u Kongsan.
Ha kane ka sngi la ïoh ban jied ïa ki nongkitkam jong ka UDP Youth Wings jong ka Ranikor Circle ha kaba u bah Bhabok Syiemlieh u long kum u President bad u bah Michael Johnson Myrthong kum u Secretary bad ha kajuh ka por la ïoh ruh ban jied ïa kiwei de ki dkhot ba shakhmat jong ka UDP Youths Wing.
U bah Pius Marweiñ, u Nongmihkhmat jong ka Ranikor Constituency haba kren ha ka jingïalang u la ong ba kum ka party UDP ka don shisha ïa ka jingkyrmen ba ha une u snem 2023 kane ka party kan sa ïoh ban long ka nonglamkhmat ne ban thaw ïa ka sorkar. Kane ka sakhi ka long ba kiba bun hi ki MLA kiba mynta ki la sdang ban khoh reh ban wan jaka rieh tngen ha ka UDP ban ïa khun ne ban long kyrtong, ong u bah Pius. U la pynkynmaw ruh ba kiba bun ki paidbah nongkyrshan ki la sdang ba phai khmat sha ka party UDP namar ki la ngiah ïa ki party na ri thor.
Namarkata, u la ong ba ka jingmihshakhmat jong ki samla ban ïa shimbynta ha ka kam saiñ hima sima kan sa long kawei na ki bynta ba khlaiñ ban wahrah ïa ki jingkylla kiba bun hapoh jong ka Ranikor Constituency bad ka dong ka thaiñ hi baroh kawei. Ha kajuh ka por u la kyntu bad ai mynsiem ruh na ka bynta ki paidbah nongkyrshan jong ka party ba haba la shah jied ba kin long ki nongïalam ki dei ban trei hok ïa la ka kam da ka jingieit, jingaiti lut, da ka mynsiem jong ka jingïarap lem bad ïatreilang ha ki liang baroh khnang ba ka jingjop kan wan ha une u snem u ban sa wan.
Ka jingjied ïa ki nongkitkam jong ki samla jong ka party ka long ruh kum shibynta ban pynkhlaiñ shuh shuh ïa ka party jong ka Ranikor Constituency baroh kawei na ka bynta ka elekshon ka ban sa wan bad kumjuh ruh na ka bynta ki snem ki ban sa wan.
Na ka bynta ki nongkitkam bad ki dkhot kiba thymmai jong ka UDP Youths Wing Ranikor Circle ba la jied mynta ka sngi ynsa pynskhem pat ha kine ki bnai ban sa wan.
Ha kane ka sngi la ïa donlang ruh ki ‘riew rangbah, ki samla na kylleng ki dong ki thaiñ jong ka Ranikor Constituency ba kynthup lang na ki Khasi bad Garo kiba la wan sha kane ka jingïalang.