Ïoh ka Tura Mokshadham ïa ka jaka thang briew ba nyngkong ba pyndonkam da ka elektrik

Shillong, Naitung 08: Ïa u mawnongrim na ka bynta ka jaka tep ne thang briew kaba pyndonkam da ka bording elektrik kaba dei ruh kaba nyngkong eh ba la pynïoh hapoh Tura (first Electric-Hybrid Crematorium) la buh ha Mokshadham, kaba dei ka Hindu Samshan Bhumi, ka la long kawei na ki jaka thang briew kaba ïarap ruh ban ïada ïa ka sawdong sawkun.
Kane ka projek kadei kaba la mang kumba T. 5 klur kaba la pyntreikam da ka tnat Urban Affairs, kaba la thmu ruh ban pynduh noh ka jingpyndonkam da ki dieng ban thang ïa ki met ïap, ka ban pynduna ruh ïa ka jingpynmih ka lyer jaboh bad ka jingjulor jong ka sawdong sawkun, bad kaban pynlait ruh ïa ki jingktah na ki jingma ïa ka koit ka khiah.
Ha kane ka jaka yn pyndonkam lang ruh da ka LPG bad ka bording elektrik, kaba tyrwa ruh ïa ka jinglong kaba khuid ha kaba ïadei bad ka lyer. La ong ba ka Tura Hindu Samshan Bhumi Committee (THSBC) ka la trei borbah ban pynlong thymmai ïa ka Mokshadham kaba dei ka jaka thang briew jong ki, da kaba wanrah ruh ïa ki jingpynkylla thymmai katkum ka juk mynta ha ka Shashan Kali Mandir bad ki eco-friendly cremation unit.