Shillong, Iaiong 1 : Ka tnad pulit jong ka Meghalaya ka la ïoh ïa ka khusnam ba donburom kaba la tip kum ka President of India’s Police Colour bad ïa kane la pyntip da ka tnad Ministry of Home Affairs jong ka sorkar pdeng. Ka jingïoh ïa kane ka khusnam ka dei halor ka jingtbit ka jingtreikam, ka jingbym kynran dien ha kino kino ki jingshakri bad ka jingaiti lut ha ka kam. Ka President Colour ka pynpaw ba ïoh ka jingithuh na ka ri bad ka long kum ka jingpynkup burom ïa ka jingshakri, jinglen lade, aiti lut da ka jingshlur bad ïalong kawei naduh ki ophisar haduh ki pulit ha ki kyrdan kiba rit tam jongka tnad Pulit.
Ki pulit ka jylla ki la trei bor bah ban wanrah ïa ka shongsuk shongsaiñ hapoh ka jylla, ki la ïakhun pyrshah ïa ki kam sniew kam runar, ki la ïeng rasong da kawei ka thong ban rat dyngkong ïa ki kam kaikhlaw bad kynhun kieng atiar ha ka jylla. Ka tnad Pulit ka la plie lad plie lynti wat ïa ki samla kynthei ruh ban don lang ha ki kyrdan bapher bapher khlem kano kano ka jingleh shilliang na kata ka daw ka la ïoh bun ki khusnam naduh ka khusnam Gallantry, Meritorious, Distinquished Service medal ym tang ka tnad hynrei wat ki ophisar jongka ha ki kyrdan bapher bapher ruh. Nalor kata ka tnad ka long kawei na ki tnad kaba tbit ban ïarap haba jia kino kino ki jingshah lyngshop ha ki bor mariang. Ka dei ka tnad kaba tbit ha ki Cyber Crime bad kumta ter ter. Ka don ruh la ka jong ka Anti Terror Squad.
Kumta kane ka jingïoh ïa kane ka khusnam President of India’s Police Colour ka long ka jingsngew sarong ym tang ïa ka tnad pulit jongka Meghalaya hynrei ïa ki paid nongshong shnong hi jongka jylla. Ka dei ka jingïoh ithuh ïa ka jingïatrei lang kum kawei ka kynhun naduh kiba dang shakri bad wat kiba la shongthait na ka kam ruh.
Na ka liang ka Director General of Police (DGP) ka jylla ka pynpaw ka jingsngewnguh ïa ka sorkar kaba la ïai ai ki jingkyrshan bad btin lynti, ai mynsiem na kawei ka por sha kawei ka por. Ka la pynpaw ruh ka jingsngewnguh ïa ki paid nongshong shnong jongka jylla kiba la ai ka jingshaniah bad ïatrei lang bad ki bor pulit ha ka ban pynneh pynsah ïa ka shongsuk shongsaiñ hapoh ka jylla. Ha kum kane ka por ka DGP ka ai ka jingsngewnguh ïa ki Ophisar bad baroh ki Pulit hapoh ka jylla kiba la trei shitom bad aiti lut ban pynneh pynsah ïa ka suk ka saiñ. Ka la ong ba kane ka khusnam kan long ruh kum u mawjam ban dang shim shuh shuh ka jingkitkhlieh ban nang pynneh bad kyntiew ïa ka nam bad burom ha ka jingshakri na ka bynta ka jylla, ka ri bad ki paidbah.
