Shillong, Nailar 30: Ka NERIM ka Group of Institutions ka la ïoh ïa 2 tylli ki khusnam halor ka jingjanai ha ka pule puthi bad ïa kine ki khusnam la ai da ka Economic Times ‘ET’ INDUSTRY LEADERS NORTH-EAST 2025 Award Ceremony ha kaba ïa kane ka prokram sam khusnam la pynlong da ka Times of India Group ha ka jingïatreilang bad ka Byatikram ha ka 29/08/2025.
Ka Director NERIM Group of Institutions, ka Prof (Dr) Sangeeta Tripathi ka la shah jied bad ka la ïoh ka khusnam ha ka kyrdan jong ka ‘Women Leadership in Education’, kaba bteng bad ki jingjanai ki kam shakri jong ka ha ka pule puthi bad ka jingtbit jong ka kum ka nonghikai na ka bynta kane ka thaiñ shatei lammihngi, bad kyrpang pat ïa ka jylla Assam.
Ka NERIM Group ka la shah pynkupburom bad ïoh ïa ka khunsnam; ‘Leadership in Academic Excellence’ kaba ïeng kum ka jingithuh ïa ka NERIM Group ha ki jingpyrshang jong ka ban wanrah ka jingkylla sha ki samla pule ha kane ka thaiñ shatei lammihngi ha kine ki 35 snem ba la leit naduh ba la seng ïa ka.
Ka Prof. Sangeeta Tripathi, ha ka jingkren jong ka, ka la kren shaphang kane ka thaiñ shatei lammihngi bad ba kumno ki briew hangne ki long kiba shida bad kiba la nang la tip haba ïohi na la liang jong ka ri India.
Ka la ong ba ka ngeit ba ka kynhun ki samla pule ha kane ka thaiñ ki don ka bynta kaba khraw ban shakri ïa ka ri bad ban long ki nongïalam jong ka lawei ha baroh ki liang, la ka long ha ka kam khaïi, ka kam shakri ne ka pule puthi.
Ka jingkren jong ka, ka la ktah ruh halor ka jingshisha ba haba ka ri baroh kawei ka dang ïakren halor ka jingïaryngkat jong ki longkmie, hynrei ha kane ka thaiñ shatei lammihngi kane ka bynta ka la dep ïaid shakhmat.
Katba ka la don ka kynroh ha ki longkmie ban long kiba laitluid na ka bynta ka pateng, kane ka thaiñ shatei lammihngi, ka la long ka nuksa halor kane ka kam. Ka la ong ba ki longkmie hangne la pyrkhat ba ki ïaryngkat ha kaba kane ka plie lad ba kin long ki nongïalam naduh ki por mynshwa.
Ka la long ka jingtrei shitom jong ka Prof. Tripathi
bad ka NERIM Group kaba la lah ban pynlong ïa kine ki kam na ka bynta ka jingkular ka lawei ka NERIM Group of Institutions.
