Shillong, Naitung 04: Ka Meghalaya ryngkat ka Gujrat bad Karnataka, ka la ïoh ïa ka buskit Best Performers, ha ka National Start Up Eco System lane kata ka jingtreikam ban ai jingkyrshan ïa ki samla ban ïeng ha la ki jong ki kjat da kaba seng kam seng jam.
Ha Meghalaya ïa kane ka jingtreikam la tip kum ka Promotion and Incubation of Market Driven Enterprises (PRIME) bad la sdang ïa ka ha u bnai Kyllalyngkot jong ka snem 2020.
Katkum ka jingtreikam ka PRIME, la jied 100 ngut ki samla man la ka snem ba kin ïakhun ïa ka Chief Minister’s e-Championship Challenge. Kine ki 100 ngut ki ïoh ki jingïarap ha ka liang ka jinghikai naduh ka rukom seng kam, ka jingïakynduh bad ki nongseng kam karkhana, ka jingïaphylliew jingmut halor ki lad jingïarap na ki Bank bad kiwei pat ki bor bei tyngka bad kiwei kiwei de ki jingïarap.
Kum ka lad jingïarap, kiba shah jied ki ïoh jingïarap da ka pisa 5 lak tyngka. Nangta la ïarap ruh ban ïarap ruh ban pynïoh ram ba khlem donkam siew sut haduh 25 lak tyngka ban pynheh ïa ka jingseng kam jong ki.
Haduh mynta ki don haduh 210 ngut kiba la ïoh jingïarap da ka pisa bad ka ram. Nangta kumba 1,300 ngut ki nongseng kam ki la ïoh jingmyntoi na kane ka prokram jong ka sorkar jylla bad 60 ba ka 100 na kine, kidei ki kynthei.
