Shillong, Nailar 10 : Shillong : Ka Meghalaya kum shi bynta ban pynphuh ïa ka jingrakhe dap 50 snem ka jylla ka la shah jied ban pynlong ïa ka lympung ïalehkai ba heh tam ha ka thain shatei lam mihngi jong ka Ri ba la tip kum ka North East Olympic Games kaban long naduh ka 30tarik u Risaw haduh ka 06tarik u Naiwieng mynta u snem.
Ïa kane la pyntikna da u Myntri ka tnad Kam Ïalehkai ka Jylla, Bah Banteidor Lyngdoh hadien ka jingïalang jong ka North East Olympic Organising Committee kaba long ha Meghalaya Secretariat ha kane ka sngi Balang kaba la wan ban shim bynta da ki nongmihkhmat na jan baroh ki jylla jong ka thaiñ shatei lam-mihngi jong ka Ri.
Ki jylla kiban shim bynta ha katei ka lympung ki kynthup naduh ka Arunachal Pradesh, Assam, Manipur, Meghalaya, Mizoram, Nagaland, Sikkim bad Tripura.
La pyntip ruh ba kin don haduh 18 tylli ki jait jingïalehkai ha katei ka lympung ïakhun ba 8 sngi kaban long ha ki 13 tylli ki jaka ïalehkai.
U Myntri u la pyntip ruh ba ki jingïalehkai kiban don ha katei ka Games kin kynthup naduh ka Archery, Athletics, Badminton, Basketball, Boxing, Football, Judo, Karate, Shooting, Swimming, Table Tennis, Taekwondo, Tennis, Wushu, Cycling, Golf, Weightlifting bad ka Wrestling.
La ïathuh ruh ba ka don ruh ka jingpynkhreh ba kin khot lang ïa u Myntri ka tnad DONER jong ka sorkar pdeng bad ruh ïa baroh ki Myntri Rangbah jong ki jylla ka thaiñ shatei lam-mihngi jong ka Ri ha katei ka lympung.
Ka jingïalang ka la pdiang ruh ïa ka jingtyrwa ba wanrah da u Abraham K Techi, Secretary General, NEOA ban khot katto katne ki nongïalehkai ba la paw jong ka Ri kiba dei na ka thaiñ bad kiba la jop ha ka Tokyo Olympics ne wat ha ka Commonwealth Games ruh ba kin wan kum ki nongshah khot kyrpang ha ka sngi plie pyrda ïa ka North East Olympic Games 2022.
Haba bynrap lang na ka liang u Working President ka Meghalaya State Olympic Association, Bah John F Kharshiing u la ïathuh ba la kumno kumno kin poi haduh kumba 3000 ngut tam ki nongshim bynta ha katei ka Games bad na ka liang ka sorkar jylla ki la ïaid shaid shaid mynta ban pynkhreh na bynta katei ka lympung.
Ha kane ka sngi, u Th Radheshyam, MLA bad President, kumjuh u Abraham K Techi, Secretary General, North East Olympic Association ki la aiti ruh ïa ka lama jong ka North East Olympic Association ha u Myntri ka tnad Ïalehkai ka jylla, Bah Banteidor Lyngdoh u ba hangtei hi u la aiti pat ha u Bah John F Kharshiing, Working President, Meghalaya State Olympic Association.
Kiwei pat kiba donlang ha katei ka sngi ki kynthup naduh ka Kong WAM Booth, IAS, Director, Department ka tnad Sports and Youth Affairs, (DSYA) ka sorkar jylla, Shivansh Awasthi, IAS, Under Secretary, Sports and Youth Affairs, B Syiem, Chief Engineer, Meghalaya State Sports Council, PB War Nongbri, Assistant Director, DSYA bad kiwei kiwei ki ophisar na ki tnad bapher bapher jong ka sorkar jylla.
