ïoh ka Mawthawpdah PHC sa iwei i Doctor, ai khublei ka HYC ïa ka Sorkar jylla

Mawkyrwat, ‘Naitung 29: Ka long kaei kaei kaba pynkmen bad ai mynsiem na ka bynta ki paidbah jong ka dong ka thaiñ shilliang um, ba hadien ka jingleit pynsngew jong ka HYC Mawthawpdah Area Unit ha kaba ïa dei bad ka jingdonkam doktor hapoh ka Mawthawpdah PHC mynta ka la urlong.
Namarkata, kum ka dak jong ka jingburom bad pdiang sngewbha ïa i Dr. B. Nongrum iba dang wan thymmai hapoh ka Mawthawpdah PHC na ka liang ka HYC Mawthawpdah Area Unit mynta ka sngi ka la ïoh ban pynlong ïa ka prokram lyngkot ha kaba la lamkhmat ïa ka jingïalang da u Dr. P. Lyngdoh, Medical & Health Officer, Mawthawpdah PHC.
Lah ban kdew ba ka jingleit ïa kynduh jong ka HYC Mawthawpdah Area Unit ïa ka kong (Dr) Ampareen Lyngdoh, Myntri ka tnad ka koit ka khiah jong ka Jylla Meghalaya ka dei ha ka 13 tarik u Jylliew, 2024 bad ka jingwan jurip jong ka, ka dei ha ka 26 tarik u Jylliew, 2024 nangta ka jingwan sdang ban trei ïa ka kam ka dei ha ka 26 tarik u ‘Naitung, 2024.
Haba kren ha ka jingïalang, ka Dr. B. Nongrum ka la pynpaw ka jingkhublei na ka bynta ka HYC Mawthawpdah Area Unit kaba la pynlong ïa kane ka prokram ban pdiang sngewbha ïa ka hapoh ka dong ka thiañ khamtam eh hapoh Mawthawpdah PHC bad kane ka long ka sien ba nyngkong ba kan ïoh ban wan ha kane ka thaiñ. “Nga kular ba nangne shakhmat kumba phi la pynsngew ngan sa ai ka jingïatreilang ha baroh ki liang khamtam eh ban pyntyllun ïa ki kam hapoh ka PHC ban ai ka jingsumar ïa kiba donkam ka jingïarap ha ka liang ka koit ka khiah”, ong ka Dr. Nongrum.
Ha kane ka sngi la don lang u bah Boniface Shangpliang, President ka HYC Mawthawpdah Area Unit, u bah Wellman Kharlyngiong, General Secretary ka HYC Mawthawpdah Area Unit, u bah Wallam Nongsiej, Chairman Synjuk ka Seng Samla Shnong Shilliang Um Zone lem bad kiwei de.
Hadien ka jingïalang, u bah Boniface Shangpliang, President ka HYC Mawthawpdah Area Unit haba kren ha ki lad pathai khubor u la ka jingaikhublei ba kyrpang ïa ka kong (Dr) Ampareen Lyngdoh ka Myntri ba dei peit ïa ka tnad ka koit ka khiah jong ka Jylla kaba la shimkhia bad sngap ïa ka jingleit ud jong ka HYC Mawthawpdah Area Unit ha ka 13 tarik u Jylliew, 2024 halor ka jingdonkam doktor hapoh ka Mawthawpdah PHC. Namarkata, lyngba kane ki kyrmen ba da ka jingdon sa iwei i doktor kane ka jaka sumar kan sa plie bad treikam noh 24×7 hapoh ka jingïalam u Dr. P. Lyngdoh, Medical & Health Officer, Mawthawpdah PHC ryngkat ka jingïatreilang jong baroh kiba hapoh ka jaka sumar.