Nongstoiñ, Nailur 12: Ka jingpyntreikam jong ka sorkar ïa kawei ka skhim ba kyrpang na ka bynta ki paitbah kaba la tip kum ka CM-ELEVATE ka la long ka jingmyntoi kaba khraw na ka bynta ki nongrep. Ïa katei ka skhim ka sorkar ka la pyntreikam lyngba ki tnad trei kam kum ka Block, Agriculture bad kiwei kiwei ki tnad treikam, ba kin pynpoi sha ki paitbah jong ki shnong kiba hap ha ki Block bapher bap her jong baroh ki district ha ka jylla.
Na ka bynta ka West Khasi Hills, ka Mawshynrut bad ka Rambrai Jyrngam constituency ki dei ki constituency kiba nyngkong eh kiba ka sorkar ka la ai da ki kali Mahindra pickup sha ki nongrep, ïa kiba ka sorkar ka la bynshet ha ka Agriculture department West Khasi Hills District Nongstoiñ, ba kan pyntreikam ïa katei ka skhim na ka bynta ki nongrep hapoh ka District.
Ïa kawei ka kali Pickup kaba dei na ka bynta ka Mawshynrut constituency la ai sha ka Nongriangka Weilong IVCS. Katba ïa kawei pat la ai sha u bah Johny Lyngkhoi u ba dei na Rambrai Jyrngam constituency.
U bah Methodius Dkhar MLA ka Mawshynrut kum u kongsan ha ryngkat ka jingïadonlang jong u bah R.G.Momon MLA ka Rambrai Jyrngam uba long u symbud kongsan, ki la pyllait hynne ka sngi ha Conference hall jong ka ophis Mawshynrut Block.
Kiba la sakhi lang ki long ka kong H.Syiemlieh Assistant District Agriculture Officer, ka kong P.Ïawim District Agriculture Officer West Khasi Hills, u bah Reginald Kharkongor Block Development Officer Mawshynrut Block, bah A.Nongkhlaw District Project Manager, ki nongmihkhmat na ka Meghalaya Rural Bank Seiñduli, ki Nongkitkam bad ki dkhot jong ka Nongriangka Weilong IVCS, u bad Johny Lyngkhoi bad kiwei ki nongtrei jong ka tnad Agriculture, Block ophis bad ki nongshong shnong.
U bah Methodius Dkhar MLA ka Mawshynrut haba ai jingkren, u la ong ba ki nongïoh ïa kitei ki kali ki dei ban sumar bha bad kim dei ban ong ba ki dei ki mar sorkar, namar ka sorkar shisien ba ka la ai sha ki paitbah kam ju leit shim shuh hynrei ka la ai duh noh ha ki.
Ka jingai ïa kitei ki kali ka dei lyngba ka jingbei pisa jong ki Bank ha kaba ka Subsidy ka long kumba 50%, kaba tam pat ka dei ka ram kaba ki nongïoh skhim ki hap ban siew pat sha ki bank.
Kumta ki nongïoh ïa kitei ki skhim ki dei ban sngewthuh ba haba ka sorkar ka ai skhim da ka pisa, katei ka pisa ka dei ka jong ki paitbah bad lada ki nongïoh skhim kim nang ban pyndonkam ka jingsep ei ka dei ka pisa jong ngi ki paitbah hi ym ka jong ka sorkar.
Ha kajuh ka por u bah Methodius Dkhar u la aiti ïa u shabi jong ka kali sha uwei na ki nongïoh bad ryngkat u bah R.G.Momin, ki la khaweh ïa ka lama kum ka dak jong ka jingpyllait bad aiti ïa kitei ki kali sha ki nong ïoh.
