Nongpoh, Nailar 07: Ka Dorbar Shnong Khlieh Umstem mynta ka sngi ka la ïoh da ka kali Ambulance ban ai ka jingshakri sha ki paidbah ha kaba ïadei bad ka pang ka shitom.
Katei ka kali Ambulance kadei kaba la mang pisa lyngba ka Chief Minister’s Special Development Fund (CMSDF) bad la pynlait paidbah mynta ka sngi da u MLA ka Mawhati u Bah Charles Marngar ha ka jingdonlang ka Dr. Anju R Marak, District Medical and Health Officer (DMHO) ka Ri Bhoi, Dr. E Tlang, Doctor In-Charge ka Mawlasnai CHC, Bah F. Teron, Rangbah Shnong ryngkat ki paidbah nongshong shnong.
Na ka liang u MLA u la ai ka jingkhublei ba kyrpang ïa u Myntri Rangbah ka jylla u Conrad K Sangma u ba la tip ruh kum u myntri rangbah jong ki paidbah, bad lyngba katei ka ambulance kan long ka jingkyrkhu ym tang ïa ka paidbah ka shnong Khlieh Umstem hynrei wat ki shnong ba marjan ban dang pynkhlaiñ ka jingshakri ha kaba ïadei bad ka koit ka khiah khamtam ha ka por ba donkam kyrkieh.
Na ka liang ki paidbah ki la ai ka jingkhublei ba kyrpang ïa u MLA bad kumjuh ruh u Myntri Rangbah kiba la shimkhia ban pynurlong ïa ka jingangnud ki paidbah ban ïoh ïa ka kali ambulance na ka bynta ka jingshakri ïa kiba pang ba shitom.
