Nongpoh Jylliew, 24 : Palat spah ngut ki paidbah jong ka thaiñ Zero Point, Kyrdem Kulai ki l a ïoh ka jingsumar ei (Free Medical Health Checkup), ha ka 22 tarik Jylliew bala pynlong da ka Gracious Givers Foundation kaba dei ka kynhun treimon sngewbha, bad lyngba katei ka jingsumar ei ka la long shisha ka jingkyrkhu ïa ki paidbah nongshong shnong katei ka thaiñ naduh ki khyllung, ki longkmie bad ki rangbah.
Ha kane ka sngi na ka liang ka Gracious Givers Foundation ka la pynbiang ruh ki doctor ban peit bñiah ïa ki paidbah naduh u Dr Ronald Dunai, Dr. Ibadaiamon Mawroh, Dr Jordan Kharrubon bad Dr Kaushal Das nalor ki Pharmacist, ki nurse bad kiwei kiwei ki riew rangbah na katei ka shnong.
La wan ruh ban shim bynta ha katei ka sngi ka jingai jingsumar ei da u Bah Donlang Sohkhlet Vice Chairman ka Meghalaya Resource Employment Generation Council kum u kongsan ban pynshngaiñ bad kane ka dei ka sien kaba nyngkong ba don kum katei ka jingsumar ei ha katei ka thaiñ.
Haba kren ha katei ka sngi na ka liang u Bah Donlang Sohkhlet kum u kongsan u la ai ka jingïaroh ïa katei ka kynhun trei mon sngewbha kaba la shim ïa katei ka sienjam ban pynlong ïa katei ka jingai jingsumar ei sha ki paidbah na katei ka thaiñ khamtam kiba duna ka jingïoh ki lah ban tip ïa ka jinglong jingman ka koit ka khiah ha ka met ka jong ki.
Ha kajuh ka por ruh u la ong ba kum ki nongshong shnong ngi dei ban don lang kata ka mynsiem ban ïa trei lang na ka bynta ka bha ka miat bad ka roi ka par jong ka dong bad ka thaiñ, namar lada ym don kata ka jingïatrei lang ka long kaba eh ba ngin lah ban kyntiew la ka long ha ka koit ka khiah ne ha kiwei kiwei ki bynta jong ka jingim.
