Jowai, Lber 21: Ka Jowai City YMCA ha ryngkat ka ophis District Social Welfare Officer, Jowai bad ka tnad ka koit ka khaih jong ka West Jaiñtia Hills District, Jowai hynnin ka sngi 20 tarik u Lber ki la pynlong da ka lad ai jingsumar ei ïa ki riew tymmen haka ophis YMCA kaba don ha Iawthymme, Jowai.
Baroh ki riew tymmen ne ki (senior citizens) kiba la poi sha kane ka Health Camp na ka bynta ban ïoh jingmyntoi ki la don haduh 41 ngut.
Na ka liang ki nongai jingsumar naduh ki Physicians bad ki nongtrei ka koit ka khiah na ka Ladthalaboh Urban Health Centre, Jowai bad na ka Bansara Eye Care Centre, Jowai ki la pynlong ïa ka jingjurip bniah (examinations) ïa kitei ki riew tymmen.
Ha kajuh ka sngi la pynlong ïa ka prokram ai jinghikai ba la pynlong da ki kynhun na Ladthadlaboh kiba la ai jingtip halor ka Non-Communicable Disease (NCD) bad ka kynhun jong ka Bansara Eyes care ki la ai jingtip halor kumno ban ïoh jingsumar biang por haka bor ïohi jong ki khmat na ka bynta ki riew tymmen.
Dr. H.L Suting, DEIC Manager, Jowai ila ai jingkren shaphang ka skim Rashtriya Vayoshri Yojana (RVY), da kaba pynsngew ïa ki lad jingmyntoi kiba lah ban ïoh ïa ki riew tymmen bad kiwei de ki lad jingïarap hapoh kane ka skim.
