Jowai, Naiwieng, 16: Ka Mission Smile ryngkat ka jingïatreilang bad ka Rashtriya Bal Swasthya Karyakram (RBSK), ka sorkar Meghalaya bad ka Dr. Norman Tunnel Hospital, Jowai kila pynlong ïa ka jingai jingsumar pang shyntur ne ka Cleft Surgeries hapoh ka West Jaiñtia Hills District.
Kila don haduh 31 ngut ki khynnah na baroh ar tylli ki District na West bad East Jaiñtia Hills kiba la shah sumar kaba ki khot cleft lip and palate bad ka Surgery Camp ba la pynlong ha Dr. Norman Tunnel Hospital, Jowai naduh ka 10 tarik u Naiwieng haduh ka 13 tarik u Naiwieng 2025.
Napdeng ki 31 ngut ki khynnah kiba la shah sumar, 9 ngut kiba don ïa ka jingpang shyntur cleft lip bad 14 ngut ki dei ha ka cleft palate na West Jaiñtia Hills, katba ha East Jaiñtia Hills ki don 2 ngut ha ka jingpang cleft lip bad 6 ngut kiba don ïa ka jingpang cleft palate.
U Dr. D Malakar, Operation Head ka Mission Smile Guwahati ula pynpaw ïa ka jingtrei kaba la slem bha jong ka Smile Mission. Ula kdew ïa ka kam jong ka Smile Mission kaba la sdang ha Northeast ha ki snem 2009-2010, ha kaba ka seng ka la ïasoi ïa ka soskular (MoU) bad ka sorkar Assam ha u snem 2010 bad bad ka sorkar Meghalaya ha u snem 2013 bad naduh katei ka por ka seng ka la ai jingïarap khlem jingsiew ïa ki khynnah ha kylleng ki jylla.
U la pynpaw ba ha ki snem kiba la leit noh, ka Mission Smile kala pynlong bun tylli ki camp ha kane ka jylla Meghalaya, kynthup ha Shillong Civil Hospital bad Ganesh Das Hospital, Shillong. U Dr. U Malakar ula kdew ba ka kynhun mynta ka thmu ban pynïar shuh shuh ïa ka jingïaid lynti jong ka da kaba leit rung sha manla ki shnong ban ithuh ïa ki nongpang bad ban ïoh ai jingsumar.
Ka Dr. (Mrs.) Handaka L. Suting ka DEIC Manager ka West Jaiñtia Hills, Jowai ka la pynsngew ïa ki jingjop kiba la ïoh na kane ka camp bad pyntip ba ïa ka post operation ka ban wan yn sa pynlong ha DEIC hadien shiphew sngi.
Kala pynpaw ruh ïa ka jingdonkam ban kham pynsngewthuh ïa ki paidbah bad pynpaw ka jingkyrmen ba kane ka camp kaba nyngkong eh ha Jowai kan pynshlur shuh shuh ïa ki longïing ban ïashim bynta ha ki camp ki ban sa wan.
Ka Dr. (Mrs) D. Nongpluh, Medical Superintendent jong ka Dr. Norman Tunnel Hospital ka la ïasam ba kane ka jingïatreilang ka la wanrah ïa ka jingkyrmen ïa kitei ki 31 ngut ki nongpang bad ïa ki kmie ki kpa jong kitei ki khynnah kiba la la ïoh jingsumar ha kine ki lai sngi.
