Ïoh jingmyntoi ki samla pule, ki nongshong shnong ha ka jingsumar khmat ei ka NECCIE-IIM

Shillong, Risaw 11: Ka North-East Centre for Community Impact and Engagement (NECCIE), kaba dei ka centre kaba don bynta ban ïasyllok bad ki shnong ki thaw jong ka Indian Institute of Management (IIM) Shillong, da ka jingïatreilang bad ka Mission Nethralaya, ka la pynlong ïa ka jingai sumar ei ïa ki khmat ne ka Eye Camp kaba la pynlong ha ophis ka Mawdiangdiang Dorbar. Kane ka jingsdang ka phalang ïa ka jingangnud jong ka NECCIE, IIM Shillong, bad ka Mission Nethralaya ban kyntiew ïa ka bha ka miat ki paidbah bad kumjuh ruh ba kin ïoh ki lad jingsumar ha kane ka thaiñ.
Ki la don haduh 94 ngut kiba la shim bynta, kiba dei naduh ka rta kaba 4 snem haduh ka rta kaba la 84 snem, kiba la ïoh ki jingshakri bad jingsumar ha kane ka camp. Napdeng kiba ïoh jingmyntoi ki la dei ki samla pule napoh ka Quiditto Lower Primary School, ha ryngkat bad ki nongshong shnong jong ka shnong Mawdiangdiang bad ki dong kiba marjan jong ka Mawkasiang.
Ha kane ka camp ki la don ki jingai jingsumar ïa ki khmat, kynthup ka jingkhmih bniah ïa ki khmat, ka vision testing, bad ka jingsam ei ïa ki dawai bad ki ïitkhmat. Ki Optometrist na ka Mission Nethralaya ki la don ha kane ka sngi ban khmih ïa ka koit ka khiah haba ïadei bad ki khmat, nangta ka jingkhmih ïa ki jingïohi bad ki jinglong jingman jong ki khmat bad la mynjur ruh ba kan don ka jingbuddien lada donkam halor kane ka kam sumar ïa ki khmat.
Ïa kane prokram ai jingsumar ei ïa ki khmat ka la long kam da ka jingkyrshan bad jingïatreilang jong ka Dorbar Shnong Mawdiangdiang, ha kaba da ka jingdon bynta lang jong ki, ka la pynlong ïa ka prokram kaba ïaid beit ïaid ryntih bad ka jingïashim bynta ba shitrhem jong ki nongshong shnong.
Kane ka eye camp ka dei shi bynta jong ka jingthmu ka NE-CCIE- IIM Shillong ban wanrah ki kam pynroi lyngba ki kam bapher bapher ha kylleng jong ka jylla Meghalaya bad ki jylla kane ka thaiñ shatei lammihngi lyngba ki kam kiba ïadon bynta lang.