Mawkyrwat, Naiwieng, 16: Ka ophis treikam jong ka District Sports Officer jong ka South West Khasi Hills District ha ryngkat ka jingïatreilang bad ka Ophis jong u Deputy Commissioner ka South West Khasi Hills District ka la pynkut noh ïa ka Chief Minister District Level Youth Engagement Program 2025 ha South West Khasi Hills District kaba dei jong ka District Level ha Multipurpose Hall jong ka DC’S ophis Laitlawsang, South West Khasi Hills District.
Ha ka sngi sdang la wan ban plie pyrda da u bah F.B. Basan, MCS, Additional Deputy Commissioner, South West Khasi Hills District kum u kongsan bad ha ka sngi pynkut la wan ban pynhap pyrda da u bah Renikton Lyngdoh Tongkhar, MLA ka Mawkyrwat Constituency, ha ryngkat ka jingdonlang naduh u bah B. Mawlong, IAS, Deputy Commissioner, South West Khasi Hills District, ka N.D. Shira, MCS, Assistant Commissioner, South West Khasi Hills District, u bah B. Jyrwa, MPS, Superintendent jong ki Pulit ka South West Khasi Hills District kynthup ïa kiwei de ki ophisar bad kiba la shah khot sngewbha naduh ki nonghikai bad ki khynnah skul bad ki samla pule kiba la wan ban ïashimbynta ha ki jingïakob bapher bapher.
Ki program ba la pynlong ki kynthup ïa ka jingïatai halor ka ‘Life Skills/Career Guidance/Communication Skills, ka Jingïakop tem guitar, ka jingiakop thohkhana, ka jingïakop poitri, ka Declamation, ka One Act Play, ka jingïakop tan tyllai, ka jingïakop rwai ne Folk Song, ka Science Mela, jingïakop dro dur, ka jingïakop shad ne Folk Dance, ka jingïakop kyntip bad kiwei de.
Ki nongjop ha ki jingïakop ki long ha ka Jingïakop Tem Guitar la jop da u bah Khlaiñbor Ramsiej, ha ka jingïakop thoh poetry la jop da ka Ibansara Kharjharin, ha ka jingïakop thoh khana lyngkot la jop da ka Medarisha Iawphniaw, ha ka declamation la jop da ka Ibameaihun Marbaniang, ha ka jingïakop dro dur la jop da u Phalnesstar Lyngdoh, ha ka jingïakop kyntip la jop da ka Maharam Government Higher Higher Secondary School, Mawkyrwat.
Nangta, ha ka Science Mela la jop da ka St. Xavier College, Umoid, ha ka One Act Play la jop da ka Sngap Syiem College, Mawkyrwat, ha ka jingïakop tan tylli la jop da ka St. Xavier College, Umoid, ha ka jingïakop rwai (Folk Song) la jop da ka St. Xavier College, Umoid, bad ka jingïakop shad (Folk Dance) la jop da ka Nolikata Higher Secondary School, Ranikor.
Kumta ha kaba kut jong ka program la ïoh ruh ban sam ïa ka khusnam sha baroh ki nongjop kiba la ïakop bad pyni ïa ki sap ha ki jingïakob bapher bapher ba la sam da ka khusnam ryngkat ki syrnod.
