Khliehriat, Lber, 25: Da ka jingthmu ban pynbiang ïa ki jingshakri ba kongsan ha ka liang ka koit ka khiah kynthup ïa ki jingpeit bniah, jingsumar ïa ki jingpang bad kiwei kiwei bad ban pynsngwthuh sha ka imlang sahlang halor ka jingdonkam jong ka koit ka khiah, ka ophis u District Medical & Health Officer, East Jaiñtia Hills District ha ryngkat ka jingïatreilang bad ka Opioid Substitution Therapy (OST) Centre, Khliehriat bad Mihmyntdu Community Social Welfare Association (MCSWA) hynne ka sngi ba Ar ka la pynlong ïa ka ‘Health Camp’ ha Umpleng (Cement), EJHD.
Ha kane ka ‘Health Camp’ la wan ïashim bynta da u Medical & Health Officer, in-charge Opioid Substitution Therapy (OST) Centre, Khliehriat, u Dr J. Nongtdu, Programme Manager, Mihmyntdu Community Social Welfare Association (MCSWA), Khliehriat, Kong Rinibeth Patlong, Nurse na Sutnga CHC, Khliehriat Civil Hospital ha ka jingïadon lang ki nongshong shnong ka thaiñ.
Haba ai jingkren halor ka ‘Health Camp’ u Medical & Health Officer, in-charge Opoid Substitution Therapy (OST) Centre, Khliehriat, u Dr J. Nongtdu u la ban jur halor ka jingkordor jong kane ka camp kaba ka jingthmu ba kongsan jong ka, ka long ban peit bniah ïa ka jingdon jong u khniang jingpang Hepatitis Virus hapdeng ki nongïashim bynta ha kane ka Camp, da kaba pynpaw ruh ba ki briew kiba don ha ka jingman ki lah ban ïoh ïa ka jingpang Hepatitis, kata da kaba kyntu ruh ïa kiba don ha ka jingïalang ba kin wan shakhmat na ka bynta ban leh ïa ki test halor kane ka jingpang.
U Dr Nongtdu ula pynshai ruh halor ki rukom bapher bapher ha kaba ka jingpang Hepatitis B bad C ka lah ban ktah ïa ki briew lyngba ki rukom bapher bapher kaba kynthup ka jingsaphriang lyngba ka snam, ka jingpyndonkam lang da ki juh ki nar injek, ka jingpyndonkam ïa u brut shut bniah jong kiwei pat bad kiwei kiwei da kaba batai ruh halor ki jingma bapher bapher kiba don jingïadei bad ka jingpang Hepatitis C.
Nalor kata u la ai nuksa ruh halor ki jait jingpang Hepatitis bad ong ba ka jinglehkhuid ka dei kawei na ki lad ba kongsan ban lait na ka jingpang Hepatitis A & E. Nalor kata u Dr Nongtdu u la ban jur ruh halor ka jingdonkam ban ai tika bad ban lap kloi ïa kane ka jingpang.
Katba na ka liang ka Programme Manager, Mihmyntdu Community Social Welfare Association (MCSWA), Khliehriat ka Kong Rinibeth Patlong ha ka jingkren ka la pynpaw ka jingsngewnguh ïa ka ophis jong u DMHO, EJH halor ka jingpynlong ïa kane ka Health Camp da kaba kyntu ruh ïa ki paidbah ka thaiñ ba kin shim ïa ka kabu ban aijingsumar khlem jingsiew ha kane ka camp bad ban phah test ïalade ïa ki jait jingpang bapher bapher khamtam ka jingpang Hepatitis.
Ki jingshakri ba la ai ha kane ka jaka sumar ki kynthup ïa ka jingpeit bniah ïa ka jingpang Hepatitis B & C, ka jingai tika ïa ka jingpang Hepatitis B, ka jingpeit bniah ïa ka jingpang HIV, ka jingpeit bniah ïa ka BP, jingpang shini bad kiwei kiwei.
