Mairang, Nailur 8: Kum shibynta ban ai jingpynshai sha ki nongtrei ASHA bad Anganwadi halor ka aiñ kaba ïadei bad ki nongshong shnong kiba don jingduna ha ki dkhot met, kata, ka Rights of Persons With Disability Act, ka Composite Regional Centre for Skill Development, Rehabilitation and Empowerment of Persons With Disabilities, Shillong (CRC-Shillong), kaba long kawei na ki shnat treikam jong ka tnat Social Justice and Empowerment ka sorkar India, ha ryngkat ka jingïatreilang bad ka ophis jong ka State Resource Centre for Disability Affairs, ka Commissioner of Persons With Disabilities bad kumjuh ka tnat Social Welfare bad ka tnat ka koit ka khiah jong ka sorkar jylla, hynne ka sngi ki la pynlong ïa ka prokram ai jinghikai bad jingpynshai halor ka phang ‘Disability & Rights of Persons With Disability Act’ ha Tirot Sing Memorial Hall, Pyndengumiong, Mairang.
Ki nongtrei ASHA bad Anganwadi ka thaiñ kiba la wan sha kane ka prokram jingpynshai kaba shi sngi, ki la ïoh jingpynshai halor kiba bun ki bynta jong ka aiñ kaba ïadei bad ki nongshong shnong kiba don jingduna ha ki dkhot met na ki riewshemphang halor kane ka mat, kiba kynthup ïa u Bah R.J Wahlang u ba long u Physiotherapist, i Kong I. Shadap iba dei I Clinical Psychologist, i Kong I. Wahlang iba dei i Lecturer ha CRC Shillong bad i Dr. M. Nongphud iba dei i Pathologist.
Ha kane ka prokram ai jinghikai kaba shisngi, la ïoh ruh ïa ka jingkren na u ophisar ba dei khmih ïa ka CRC Shillong, u Ram Shakal Sahani bad u coordinator ka CRC, Shillong, u Akshay Kumar.
