Nongpoh, Nohprah 09: Ka Development Commissioner Handloom hapoh ka Ministry of Textiles ka la pynlong ïa ka jingai jingtip bad jinghikai ha kaba ïadei bad ka rukom pynïaid ïew ïa ki tiar thaiñ bad ki tiar shna, da ka thong ban kyntiew ïa ka roi ban pynmyntoi ïa ki nongbylla shna jingshna bad ki nongthaiñ jaiñ ha baroh ka thaiñ Shatei Lam Mihngi.
Ïa katei ka jingïalang la pynlong ha Integrated Textile and Tourism Centre, Mawdiangum, Nongpoh ha Ri-Bhoi District, ha kaba ki nongshna jingshna, ki nongthaiñ bad ki nongsengkam lajong na ki jylla bapher bapher ka thaiñ Shatei Lam Mihngi ki la wan ban shim bynta.
U S. Bandyopadhyay, Zonal Director (East Zone), WSC Guwahati, bad ka Dipika Lyngdoh, Zonal Officer (Weaving), Department of Textiles, jong ka sorkar Meghalaya, ki la kren shai bñiah shaphang ki sienjam ba ka sorkar ka la shim ban kyntiew ïa ka handloom sector, bad ki la ai jinghikai kumno ban pynkhlaiñ ïa ka ïew ka hat bad ka jingshalan ban pynïaid ïew ïaki mar shabar.
Ki nongai jinghikai (resource persons) ki la ïathir ïakren halor ka jingpynkhlaiñ shuh shuh ïa ki lad ban kyntiew ïaka ioh ka kot ki nongthaiñ jaiñ bad ki nongshna tiar da ki kti naduh ka jingpynkhlaiñ ïaka iew ka hat kumno ban pynïaid ïaki mar jong ki namar ban diew tang ha ka jaka lajong ka shem jingeh ban kyntiew ïaka ioh ka kot ki nongrep kumta donkam ruh ban shalan sha kiwei kiwei ki jaka bad wat shabar jylla.
Lyngba kane ka jingïalang ka long shisha ka jingkyrkhu bad ka jingmyntoi ïaki nongthaiñ bad ki nongshna lyngba ka jingkyrshan ka sorkar jylla bad kumjuh ruh ka sorkar pdeng ban kyntiew ïaka ioh ka kot ki nongrep.
