Nongstoiñ, Jylliew 28: Ka ophis jong u District Agricultural Officer, Eastern West Khasi Hills District Mairang, ka la pynkut noh ïa ka ‘District Level cum Competition on Agricultural and Horticultural crops and Honey’, lane ka jingïakop pyni nam ïa ki mar rep kum ki jhur, ka ngap bad kiwei. Kane ka jingïakop pyni nam ka la sdang naduh ka 26 tarik Jylliew bad la pynkut noh ha ka sngi ka 27 tarik ha ka phyllaw jong ka ophis u District Agriculture Officer, Mairang.
Ha kane ka prokram la wan ban sakhi lang da ka Deputy Commissioner, Eastern West Khasi Hills District Kong Anita Kharpor kum ka kongsan, ha ryngkat ka jingwan synran lang u Bah A.Nongbri bad Bah M.Diengdoh, ki Additional DC lem bad ka jingdonlang ka District Agriculture Officer Kong A.Nongbri bad kiwei kiwei ki ophisar sorkar na kiwei ki tnad treikam.
Ha kane ka jingïakop pyni nam la sakhi ïa ka jingwan ki nongrep na kylleng ki Shnong ka thaiñ Eastern West Khasi Hills District, ban ïashim bynta bad pyni nam ïa ki jhur, ki soh, ki syntiew, ka ngap ki dawai khasi ba la thung bad shna hi.Kane ka rynsan pyni nam ka long kum ka jingplie lad plie lynti ïa ki nongrep ban pyni ïa ki mar rep jong ki, ban ïoh jingtip shuh na kiwei ki para nongrep bad na ki ophisar sorkar halor ka kam rep, ki skhim sorkar bad kiwei kiwei ki lad jingtip. Shuh shuh, na ka liang ka tnad ka rep ka riang, ka Agriculture bad Horticulture ki la pynshlur bad ai mynsiem ïa ki nongrep, ha kaba ïa dei bad ki mar rep jong ki da kaba sam ïa ki khusnam sha ki nongjop kiba wan ha ka kyrdan kaba nyngkong, ba ar bad ba lai da ka Syrnod bad ka song pisa.
