Shillong, Nailar 01 : U Myntri Rangbah ka jylla u Conrad Sangma ha ka sngi Palei u la pynlait paidbah ïa ka song jingïarap pisa ba ka tip kum ka FOCUS+ kum shi bynta ban ïarap ïa ki nongrep jong ka jylla. Lyngba kane ka song jingïarap ki nongrep kin ïoh jingïarap mar 5000 tyngka ban pynïar ïa ka rep ka riang ha ka jylla.
Ïa kane ka song jingïarap la sam paidbah da u Myntri Rangbah ha ka jingïalang kaba la long ha Resubelpara, North Garo Hills.
Haba kren ha ka jingïalang u Myntri Rangbah u la ong ba, “Ha kine ki saw snem shiteng, kum ka jylla ngi la kiew sha khmat ha kiba bun ki liang bad kaba ngi buh jingmut ha khmat eh ka dei ha ka rep ka riang. Ka jingkyrshan ïa ki nongrep lyngba ka FOCUS ka la ai jingïarap kaba kaba khraw ïa ki nongrep ban pynjanai ïa ka rep ka riang jong ki. Ka jingpynmih ka sorkar kum ïa ki Mission ba pher ba pher kum ka Lakadong, Piggery, Milk, Spice, Ginger, Aroma bad kiwei ka la ai jingkyrshan kaba khraw ïa ki nongrep naduh na lyngkha haduh ban da poi ha ki iew ki hat”
“Ka FOCUSka la ïoh jaka kyrpang ha ka dohnud jong nga namar ka la lah ban ïarap ïa kiba bun bha ki nongrep. Nga kyrmen ba lyngba kane ka FOCUS+ kan ïarap ïa ki nongrep nongkyndong ban lah ban kynjoh sha ka thong kaba ki angnud ban khmtam ban kyntiew arshah ïa ka kamai kajih jong ki” ong u Myntri Rangbah.
