Jowai, K’lyngkot 28 : Ka Meghalaya Basin Management Agency (MBMA), District Project Management Unit (DPMU), West Jaiñtia Hills bad ka State Project Management Unit (SPMU-CDP), Shillong ha kane ka 22 tarik kila pynlong ïaka jingsam ïa ki tiar mar rep kum ka Farm Machineries and Agri Response Vehicles (ARVs) hapoh ka Horticulture Cluster Development Programme (CDP) West Jaiñtia Hills District.
Ïa kane ka prokram la pynlong ha Laskeiñ C&RD Block Hall ïa kaba la bei pisa da ka National Horticulture Board (NHB) bad ka Planning Department jong ka Sorkar Meghalaya.
Ha kane ka sngi u ma Comingone Ymbon, MLA ka 3-Raliang Constituency ula long kum u kongsan katba u ma F. Passah, MCS, Assistant Commissioner, West Jaiñtia Hills kum u symbud kongsan. La don lang ruh u Dr. F. R. Shadap u Block Development Officer ka Laskeiñ C&RD Block, ka kong Lucky Diengdoh Joint Director ka tnad Horticulture, ma D. Lyngdoh u Assistant Director Horticulture, WJH, ma A S Suting, Deputy Project Director ka MBMA, ka kong M. Syngkon, DPM, MBMA, WJH ryngkat ki nongtrei jong ki kitei ki tnad.
Baroh 111 tylli ki mashin rep bad ki 7 tylli ki Agri Response Vehicles (ARV) la sam da u kongsan lem bad kiwei de sha ki sha ki nongïoh jingmyntoi lyngba ki Community Based Organisations (CBO) kiba hap hapoh ki Cluster. Ha ka juh ka por yn ïarap ïa ki nongrep ba kin ïoh pyntrei ïa kitei ki mashin ha ka dor kaba duna lyngba ki 12 tylli ki Custom Hiring Centre (CHCs) kiba la buh ha ki Cluster. Katba ïa ki 7 tylli ki Kali (Agri response Vehicles) kin ai jingshakri ïa ki nongrep na ka bynta ban pynkit ïa ki mar rep jong ki sha ki jaka kiba dei ban pynpoi ïa ki mar ki mata.
Na ka liang u ma Comingone Ymbon ula ban jur ba ka jingsam ïa ki kor rep bad ka Agri Response Vehicle kan pynsuk ïa ki nongrep ban kyntiew ïa ka ïoh ka kot jong ki. Haka juh ka por u kyntu jur ban pyndonkam hok da kaba husiar bha haba pyndonkam ïa ki khnang ba kin neh slem.
Ula pynsngew ruh shaphang u shynrai Lakadong uba la pawnam bha ha katei ka thaiñ namar ka jinglong ba bha jong u bad ula ban jur ban pynneh pynsah ïa ka kyrdan bad ka nam jong une u mar rep naduh ka rukom song kaba biang.
Ula khot ruh ban don ka jingïatreilang na ki shnong ki thaw ban pynkhuid ïa ki surok, ki jaka paidbah, khamtam eh ïa ki bynta ka Kupli Tourist Spots bad ïa kiwei de ki jaka jngohkai pyrthei. Ula kyntu ba ym dei ban bret pathar ïa ki jaboh jabaiñ, kum ki trai shnong ki dei ban long ka nuksa ïa ki nongwan jngohkai khnang ban kyntiew ïa kane ka kam jngohkai hapoh ka District.
Katba u bah D. Lyngdoh, Assistant Director Horticulture ula pynsngew ïa ka kaiphod lyngkot halor ka jinglong jingman bad ka rukom pyntreikam ïa ka Horticulture Cluster Development hapoh ka District.
