Nongpoh, Nailur, 12: Ka Indian Institute of Technology, Guwahati mynta ka sngi ka la pynkut noh ïa ka prokram ai jinghikai kaba kypang kaba 2 sngi na ka bynta ki khynnah skul kiba la wan shim bynta na ki skul bapher bapher ka Ri Bhoi ba la pynlong ha District Library Hall, Ri Bhoi District.
Ïa kane ka prokram ai jinghikai kiba dei shaphang ka ‘Design’ la wan ban plie da u Deputy Commissioner ka Ri Bhoi u Abhiliash Baranwal hynnin ka sngi ha Auditorium Hall ka Ri Bhoi College bad la ïa don lang ruh naduh Additional Deputy Commissioner u Raja Brahma, u Prof. Pratul Kalita, Head of the Department of Design, IIT Guwahati, u Dr. Soumen Director of T.I.M.E., ka Dr. Sharmishtha Banerjee, Assistant Professor, IIT Guwahati, Dr. Elizabeth Kharkongor, Principal ka Ri Bhoi College lem bad ki khynnah skul na ki 20 tylli ki skul na Ri Bhoi.
Kane ka Prokram ai jinghikai la ai kyrteng kum ka ‘Abhilasha 2025’, kaba la sdang na Ri Bhoi College bad pynkut noh mynta ka sngi ha District Library Nongpoh, ha kaba la ai jinghikai ïa ki khynnah kyrpang halor ki design ne ka rukom saindur ïa ki jaid kam bapher bapher, kiba lah ban ai jingmyntoi na ka bynta ka lawei ki samla.
Ka IIT Guwahati ym tang ba ka la pynlong ïa ka prokram ban ai jinghikai ïa ki khynnah skul halor kita ki kam design kiba hap ban pyndonkam ha ki jaid kam bapher bapher, hynrei la ïa thir ruh halor ki lad ki lynti ba ki khynnah skul kiba don sap ki dei ban ioh jingmyntoi lyngba ki kam design haba ki la ioh ïa kata ka lad jinghikai lyngba kum kine ki jaid prorkam.
Kumba la ïathuh da u u Prof. Pratul Kalita, Head of the Department of Design, IIT Guwahati, ka IIT Guwhati lyngba ka Design Department ka ju pynlong ïa kum kine ki prokram ha jan baroh ki District ba hap ha ki jylla shatei lam mihngi ka ri India bad ka daw ka long ba ki kwah bad angnud ban ai rynsan ïa ki samla ba ki sei ïa ki sap kaba saindur ne pynwan dur ha kano kano ka sap kaba ki don.
U la bynrap ruh da kaba ong ba ki kam design ki lah ban long kita kiba ki samla don sap ki lah ban saindur la ka long ban thaw ïa ki buit treikam, ne kino kino ki kynja jingshna la ki dei kiba pyndonkam da ka kti ne katkum ka jingstad saian bad ka dei pat ban ai jingmyntoi ïa ki kum kata ka lad ioh kam ioh jam.
Shuh shuh, u la kyntu ruh ïa kine ki samla kiba la shim bynta ha kane ka prokram ba kin pyndonkam ïa ki jinghikai ba ki la ioh lum lyngba kine ki jaid prorkam bad na ka liang ka IIT Guwahati ka kloi ban ai ka jingïatrei lang na ka bynta ban kyntiew ïa ki samla don sap ha kaba saindur ne wan rah ka jingkylla kaba ai jingmyntoi ïa ki bad na ka bynta ka jylla bad ka ri hi baroh kawei, u la bynrap.
