Ïoh jingmyntoi ki 10 ngut ki samla ha ka ‘First Aid-cum-Guide Course 2022’ ba ar sngi ha Mawkyrwat

Mawkyrwat, Nohprah 06: Ki 10 ngut ki khun samla jong ka dong ka thaiñ Mawkyrwat ki la ïoh jingmyntoi lyngba kawei na ki program ai jinghikai ba ar sngi kaba la tip kum ka ‘First Aid-cum-Guide Course 2022’ ba la pynlong da ka South West Khasi Hills District Rock Climbing & Mountaineering Asso-ciation (SWKHD-RC&MA) ha kawei na ki jaka jngohkai ha Kynrew-myllah Adven-ture Training Centre & Eco-Tourism ha Mawranglang, South West Khasi Hills District.
Haba kren lamkhmat ïa kane ka prokram, u bah Pilestar Nongsiej, President ka South West Khasi Hills District Rock Climbing & Mountaineering Asso-ciation (SWKHD-RC&MA) u la ïathuh ba ïa kane ka prokram ai jinghikai la sdang naduh ka 5 tarik bad pynkut mynta ka sngi ka 6 tarik u Nohprah, 2022 ha kaba ka jingthmu jong kane ka long kumno ban ai ki lad jinghikai na ka bynta ki samla jong ka dong ka thaiñ ban long ki nongïalam ïa ki nongwan jngohkai pyrthei ne ki Tourist Guide namar bunsien hi ha kane ka bynta kiba bun kim pat biang, kumta lyngba kane prokram kan long ka jingïarap na ka bynta jong ki kumno ban ïaid nangne shakhmat ha ka ban long ki nongïalam ïa ki nongwei.
Shuh shuh u la ong ba lyngba kane ka prokram ka long ruh ban hikai ïa ki samla kumno ban ïada ïa ki nongwankai ne ki tourist lada jia ba ki mynsaw bad kiwei de ki lad jingïarap, ki nongïalam ki dei ruh ban nang ban kren bad pdiang ïa ki briew kiba nabar lada ki wan jngohkai ha kine ki jaka, namar lada dei ki briew ki bym nang ban kren ban khana ïa ki nongwei ka wanrah pynban ïa ka jingbym sngewtynnad. Namarkata, ka long kaba donkam ba kum ki khun samla ba lada don ki kynja jingai jinghikai ki dei ban ïa mihshakhmat ban long ki nongshah pyntbit khnang ba kan long ka jingmyntoi ïa ki hi.
U bah Carness Sohshang, MDC jong ka Mawkyrwat Constituency haba kren kum u kongsan u la pynpaw ka jingaikhublei na ka bynta ka South West Khasi Hills District Rock Climbing & Mountaineering Association (SWKHDR-C&MA) kaba la pynlong ïa kum kane ka ‘First Aid-cum-Guide Course 2022’ kaba long shibynta ka lad ban ai jingmyntoi ym tang ïa ka association hynrei na ka bynta ki khun samla jong ka dong ka thaiñ kiba don ka sap bad ka jinglah ban long kum ki nongïalam ban kyntiew ïa kam jngohkai pyrthei ha kane ka South West Khasi Hills District.
Ha kajuh ka por u la ai ruh ka jingïaroh ïa u bah Pilestar Nongsiej uba la long teng u nongjop ha ki jingïakiew lum ha ki snem kiba la leit noh bad kane ka la long shisha ka nuksa ba bha ïa ki khun samla ba kin bud ïa ka nuksa lyngba ka jingshim kabu jong ki ïa ki lad jinghikai. Namarkata, u la ai mynsiem ïa ki samla jong ka dong ka thaiñ ba kin mih shakhmat namar lyngba ka jingïashimbynta jong ki ha kum kine ki bynta kan long ruh kawei na ki lad ba ki khun samla kin ïoh ban rung ruh ha ki kam shipai bad kiwei de ki kam. “Lyngba ka jingïoh jong ki khun samla ban kiew ïa ki lum, ki wah bad kiew ïa ki riat ki ram, ym tang ba kin ïoh ki jingmyntoi ha ki sngi ki ban sa wan hynrei kan ïarap ruh ban pynïoh ha ki ïa ka met kaba koit kaba khiah”, ong u bah Carness.
Kumta u la ai mynsiem ruh ïa ka association ba lyngba kane ka sngi kam dei ban kut noh hynrei ai ba kan dei ka jingsdang bad kyrmen ba ha ki sngi ki ban sa wan kin sa mih bun ki khun samla ki ban long ki nongïalam ban kyntiew ïa ka kam jngohkai pyrthei ha ka dong ka thaiñ, ka jylla bad ka ri baroh kawei.
Ha kane ka sngi la wan ban pynkut ïa kane ka ‘First Aid-cum-Guide Course 2022’ la ïoh ruh ban sam ïa ki khunsam lyngba ki syrnod sha baroh ki nongïashim bynta ha ryngkat ka jingïa-donlang ruh u bah Ïohbanteilang Marweiñ, Secretary ka South West Khasi Hills District Rock Climbing & Mountai-neering Asso-ciation (SWKHD-RC&MA) lem bad ki nongïashimbynta shynrang bad kynthei.