Nongpoh, Jymmang 13: Kumba 35 ngut ki kynhun jong ki nongrep na Ri Bhoi kiba ju pynmih ïa ki mar rep ban kyrshan ïa ki nongrep na ka bynta ka iew ka hat ki la ioh jingmyntoi mynta sngi lyngba ka prokram ba la pynlong da ka FOCUS ha Science Hall, Nongpoh ha Ri Bhoi District.
Ban poi sha ka thong jong ka sorkar Meghalaya ban kyntiew ïa ki nongrep la ka dei ha ki kam ban pynmih ïa ki mar rep ne ha ki kam ban pynïaid iew ïa ki Mar rep, ka tnad treikam jong kasorkar ba la tip kum ka Meghalaya Basin Management Authority ha kane ka prokram ba la pynlong mynta ka sngi ka la sap haduh 35 tylli ki Cheque kum ka jingkyrshan ïa ka kynhun ki nongrep kiba ju pynmih ïa ki mar rep mar riang bad ruh ban pynïaid iew ïa ki mar rep ba mih na Ri Bhoi District.
Kine ki Cheque ba la pynlait sha kitei ki kynhun ki noingrep ka la poi kumba T. 20 lakh bad ïa kine ki Cheque la sam ruh sha ki kynhun ki nongrep lyngba kata ka ‘Farmer’s Collectivization ban pyntbit ïa ki nongrep bad ruh ban pynkhlaiñ ha ka kam ban pynmih ïa ki mar rep bad ruh ban pynïaid iew ïa ki mar rep.
Ïa kine ki Cheque ba la ati sha kitei ki kynhun nongrep la sam da u MLA ka Nongpoh, u Bah Mayral Born bad la sakhi lang ruh da ka jingdon lang ki ophisar na ka tnad Meghalaya Basin Development Authority na Ri Bhoi District.
U MLA ka Nongpoh, u Bah Mayral Born syiem, haba kren ha kane ka sngi, u la ai khuble ïa ka sorkar Meghalaya bad kumjuh ruh ïa ka Meghalaya Basin Development Authority kiba la shim khia ban phai khmat kyrpang sha ki nongrep bad u kyrmen skhem ruh lyngba kine ki thong ba la buh da ka sorkar jylla kan dang lah ban kyntiew bad ai jingmyntoi ïa ki nongrep ka jyla.
Ha kawei ka bynta, u la kyrpad ruh ïa ki nongrep ba kin don ka jingkitkhlieh ban ïada ruh ïa ka mariang nalor ka kam rep ka kam riang bad khamtam ban ïada kyprang ïa ki tyllong um bad ki jingdon jingem kiba don hapneh ka mei mariang khnang ba ka pateng ban sa wan kan nym kynduh jingeh halor kata ka jingma kaba ap na ka jingkylla ka bor mariang.
