Ïoh jingmut ki samla pule Synod College na ka PIB ïa ki jingai jingtip sha ki lad pathai khubor
Shillong, Jylliew 28 : Ka kynhun ki samla pule Bachelor of Arts jong ka English bad Political Stream na Synod College, ki la leit jngoh ïa ka ophis jong ka Press Information Bureau, Shillong, mynta ka sngi kum shi bynta ka prokram internship jong ki. Ka jingleit jngoh ka thmu ban pyni ïa ki samla pule ïa ka rukom treikam bad ka bynta jong ka ophis ai jingpyntip jong ka sorkar pdeng. Ïa ki samla pule la ïalam da u nongthoh khubor, Bah Starfing Pdahkasiej.
Ha kane ka jingïakren, u Assistant Director ka PIB Shillong u Gopajit Das u la pdiang sngewbha ïa ki samla pule bad u la batai lyngkot ïa ki jinglong jingman, ki kam bad ki jingkitkhlieh jong ka PIB Shillong. U la batai bniah kumno ka Bureau ka pynphriang ïa ki jingtip shaphang ki polisi, ki skhim bad ki sienjam jong ka sorkar sha ki lad pathai khubor bad ki paidbah.
Ha kane ka jingïalang la ïakren ruh ïa ki phang kiba kongsan kynthup ïa ka bynta jong ka Tnad pyntip bad pynphriang khubor, ki aiñ kiba ïadei bad ki kyndon jong ka riti synshar kiba ïadei bad ki lad pathai khubor bad ka jingïadei, bad ki rukom treikam ban pynïaid ïa ka jingpynpoi ïa ki jingtip ha ka juk digital.
Ki samla pule ki la ïashim bynta shitrhem ha ka jingïakren bad ki la buh ïa ki jingkylli kiba ïadei halor ki mat kum kumno ka Bureau ka pynïaid ïa ki jingtip kiba bakla bad ki jingkynthoh pyrshah ha ka juk jong ki social media. La batai ïa ki shaphang ki atiar bad ki lad ki lynti bapher bapher kiba don na ka bynta ban peit bniah ïa ki jingshisha bad ban pynneh ïa ka jingshaniah ha ka jingai jingpyntip da ka sorkar.
Nalor kata, la pyntip ïa ki samla pule shaphang ki lad ki lynti ha ka kam bad ki lad ki lynti hapoh ka tnad pathai khubor, ka jingpynïadei, bad ka jingïadei bad ki paidbah.
La pynshlur ïa ki samla pule ban bud ïa ki jingsngewtynnat jong ki da ka jingaiti lut. Ka jingleit jngoh ka la kut da ka jingïasam jingmut bad ki kyntien ai mynsiem, bad kumjuh ruh ka jingwad ïa ki lynti bapher bapher na ka bynta ki kam jong ki ha ki por ban wan.