ioh jingkyrshan ki pulit Ri Bhoi na ki longkmie, samla bad VDP ban tehlakam ïa ki kali ba pynkheiñ aiñ

Nongpoh, Nohprah 14: Ka jingshim khia ki bor pulit ka Ri Bhoi ha kaba tehlakam ïa kiba bun ki Kali ba pynkheiñ ha ki surok paidbah ka da long shisha ka jingkmen kaba khraw ïa ki paidbah ka Ri Bhoi, namar bunsien lada ym don kata ka jingtehlakam ka buh jingma shisha ïa ki khyllung ki khynnah bad ruh wat ïa ki riew paidbah kiba leit ba wan ha ki surokbah.
Ka surok National Highway-6 ha Ri Bhoi ka dei kawei na ka surok kaba ju jia bunsien ki jingjia ba sngewsih bad ka daw ka long ba bun ki nongñiah ki pynher sted ïa ki kali bad don ruh kiba la dih buaid, hynrei naduh ba ki bor pulit ka Ri Bhoi ki la pyrkhing bha ka la don shisha ka jingkylla ha kaba ki nongñiah kila sdang ban sheptieng ba ioh shah pynhap ha ki kyndon aiñ bad ruh bun na ki nongñiah naduh ki kali ar shaka bad ki kali saw shaka ki la sdang ban bud ryntih ïa ki kyndon ñiah kali ha Ri Bhoi District.
Haba kren halor kane ka jingpyrkhing ki Pulit ïa ki kali ba pynkheiñ aiñ, kiba bun ki paidbah nongshong shnong ka them Ri Bhoi khamtam ki shnong ba don ha shi lynter ka surokbah National Highway-6, ki ai ïa kata ka jingkyrshan kaba pura ïa ki Pulit na ka bynta ban ïada na kino kino ki jingjia ba sngewsih kiba ju ktah tang na ka daw ka jingdon ki kali ba pynkheiñ aiñ.
Kum ban pynkynmaw, ki Pulit ka Ri Bhoi ki ju tehlakam ïa ki kali ba pynkheiñ aiñ naduh ki kali ba pynher sted, kiba dih buaid, ki bym deng seat belt, ki bym don kot don sla bad kiwei kiwei ki bynta ban pynkheiñ ain bad ki Pulit ka Ri Bhoi ki la shim khia ban tehlam ka dei naka bynta ka jingshngaiñ ki paidbah ha ka leit ka wan (Road Safety).
Ki jingshisha ba ki paidbah ki kloi ban ai ka jingkyrshan ïa ki Pulit ka Ri Bhoi, halor kane ka jingtehlakam ïa ki kali ba pynkheiñ aiñ, ka dei ka jingsdang ban ïa snoh kti lang naduh ki Seng Samla, ki Seng Longkmie bad ki VDP, ha kaba man ka por ha ba ju pynlong ïa ka jingtalasi kali ki Seng Samla, ki VDP bad ki Longkmie ki ju mih ban ïa trei lang ha kaba tehlakam ïa ki kali ba pynkheiñ aiñ.
Dang shen ha ka jingtalasi kali ki Pulit ha Byrnihat, ka long ka jingai mynsiem ïa ki Pulit ka Ri Bhoi, ha kaba nalor ka jingïasnoh kti lang ki VDP bad ki Samla, ki Longkmie ha katei ka thaiñ ruh ki ïa mih lang ban ïa snoh kti lang bad ki Pulit bad da ka mynsiem jong ka jingieit hadpeng ka jingkhriat jong ka miet ki pynkhreh ruh wat ïa ka sha ka dud na ka bynta ki Pulit.
Ki kyntien kiba ju mih man ka por na u heh pulit ka Ri Bhoi u VS Rathore, ki dei ki kyntien kiba ju khot ju wer ïa ki paidbah ban ïa snoh kti lang ym tang ha ha kaba pyrkhing ne tehlakam ïa ki Kali ba pynkheiñ aiñ, hynrei ban ïa snoh kti lang ruh na ka bynta ban ïa khun pyrshah ïa kiwei kiwei ki kam sniew kiba ktah ïa ka imlang ka sahlang.