Tura, Nailur 20 : Ka Garoland State Movement Committee (GSMC) ka la ïoh ka jingkyrshan na kiba bun ki seng ba ïakhih ban ïoh jylla la ka jong hi kiba na shabar ka jylla kiba don haduh 12 tylli.
Kine ki seng ki dei naduh Ladakh, Bundelkhand, Vidarbha, Purvanchal, Harit Pradesh, Gorkhaland, Bodoland, Tripraland, Dimasa, Karbi, Mithila, Vindhya Pradesh bad kiwei kiwei.
Kumta hadien ba la ïoh ka jingkyrshan na kine ki seng ka GSMC hapoh ka jingïalam u Co Chairman jongka u Balkarin Ch Marak ka la rai ban pynlong da ka jingïalang paidbah kaba heh bha ha madan Teteng A’ja kaba ha Tura na ka bynta ban pynkhlaiñ ïa ka jingïaleh ban ïoh ïa ka jylla Garo.
Kine ki seng kin wan hapoh ka lama National Federation for New States (NFNS)bad u President jongka u dei u Prof Munish Tamang. Kine baroh ki ai ka jingkyrshan ïaka GSMC halor ka jingïakhih jylla Garo jongka.
“ Nga kyrpad ïa ki para Garo kynthei bad shynrang ban ïatylli bad ïeng ban ïaleh na ka bynta ban ïoh la ka jongka jylla Garo khlem da don ka jingsngew ïapher niam, ïapher kyrdan, jait bad kynhun” ong u Balkarin Marak.
U khot bad ïawer ruh ïa ki nongïalam niam, ki nongïalam seng saiñpyrthei, nongïalam seng bhalang ban ïadon ryngkat lem ha katei ka jingïalang ha ka 29 tarik khnang ba ka jingdawa kan khlaiñ.
“Lada ngi ïoh ïaka jylla Garo ngin don la ka jong ka Raj Bhavan, ka Assembly, Secretariat, ngi lah ban thaw la ki jong ki aiñ ki kanun bad ngin ïoh synshar hi ha ka kyndew ka shyiap jongngi” ong biang u Marak.
U la ong ba ki paidbah ki don ka hok ban dawa la ka jong ka jylla Garo kaba dei hapoh u pud u sam jongka Riti Synshar ka ri.
“ To ngin ym pynlip ïa kane ka ding ba rhem bad to ngin tur shaphang haduh ban da jop. Nga kwah ban ïathuh ïa ki paid Garo ba ha kawei ka sngi ngin sa ïoh beit ïa kaba ngi dawa” pynkut u Marak.
