Ïoh jingkyrshan bha ka NPP na ki paidbah ha kane ka kynti kaba mynta : Marcuise Marak

Shillong, Nailar 04: U nongïalam ka seng NPP bad u Myntri ka sorkar jylla u Marcuise N Marak u la pynpaw ïa ka jingsngewskhem ba mynta ka kynti ka seng ka la ïoh bha ïa ka jingkyrshan jong ki paidbah khamtam eh ha kaba ïadei bad ka election sha Garo Hills Autonomous District Council (GHADC), ka ban long ha u snem ban wan ha ka thaiñ Garo Hills.
Haba kren shaphang ka jinglong kaba la khreh jong ka seng ha kaba ïadei bad kane ka elekshon u Marak u la ong ba ka seng ka la trei borbah na ka bynta ka bha ka miat jong ka thaiñ Garo Hills kaba long ruh hapoh ka jingïalam jong u Myntri Rangbah u Conrad K Sangma.
“Hapoh ka jingïalam jong u Conrad K Sangma ki la don bun ki kam pynroi ha ka thaiñ Garo Hills. Kumta kumba ka long mynta ki briew ki don sha ka liang jong ka NPP namar ki la ïohi ïa kiba bun ki kam pynroi kiba la jia ha Garo Hills,” ïa kane u la ong haba ïakren bad ki lad pathai khubor ha ka sngi nyngkong.
U la ong ruh ba ka NPP ha kane ka kynti kaba mynta ka la shim khia bha ban jied ïa ki kyrtong kiba kynsai na ka bynta kane ka elekshon.
Haba kylli la kane ka jingeh kaba la jia ha GHADC na ka daw jong ka jingbym ïoh tulop ki nongtrei kan ktah ne em ïa ka election, u la ong ba ka seng kan mad ïa kane ka jingeh na ka daw jong ka jingleh ki executive committee kiba rim.
U la pynpaw ruh ba ka seng kan sa lah ban pynbeit ïa kine ki jingeh ban pynkhlaiñ ïa ka seng ha GHADC.