Shillong, Jylliew 12: Ka NEIGRHIMS kawei na ki jaka sumar hapoh ka nongbah Shillong ka la lah ban pyndep ïa ka jingpuid ban pynbeit ïa u budlum jong kawei ka khynnah samla kaba dang 16 snem ka rta kaba la ïoh ïa ka jingpang scoliosis ne ka jingpang ba khun ne kynriang u budlum (abnormal curvature of the spine) bad ïa kane ka jingpuid la pyndep hapoh ka tnat Orthopaedics.
Kane ka jingpuid kaba kyllaiñ bad jyrwit jyrwat la pyndep da ka kynhun ki doktor puid (surgical team) ba la ïalam da Dr Sachlang Debbarma ha ryngkat bad Dr Tashi G Khonglah bad Dr Penthungo Ezung hapoh ka jingïalam jong Dr Sharat Agarwal bad Dr Bhaskar Borgohain, Head ka tnat.
Haba buh kum ka nuksa jong ka jingïatreilang hapdeng ki tnat, ïa kane ka kam sumar la pyndep ha ka por ba puid da kaba pynthikna ba kan don ka jingïada na ka jingmong u budlum bad ïa kane ka jingpuid la leh hapoh ka jingbthah jong Dr John Lyngdoh napoh ka tnat Physiology. Na ka liang ka tnat Anaesthesiology bad ki nongtrei nurse ki la ïashim bynta lang na ka bynta ka jingïaid beit ka jingsumar ha kane ka por.
Na ka liang ka NEIGRHIMS la ïathuh ba kane ka samla ka la don ha ka jinglong jingman kaba biang bad ka la ïoh ruh ka jingkoit bad mynta ka dang don hapoh ka jingpeit bad jingkhmih jong ka kynhun ki nurse kiba dang ïarap ruh ïa ka da ka jingkyrshan ka physiotherapy.
Ka jingpang Scoliosis la batai ba kadei ka jinglong bym beit ne ba khun u budlum bad lada la shu ieh khlem sumar kan lah ban lam sha ki jingsoh kyrdot kiba ma kum ka jingpang kaba neh, ka jingthut ha ka ring mynsiem bad ka jingktah ha ka jingim ba manla ka sngi. Ka jinglah ban shem kloi bad ka jingpyndep ïa ka jingpuid ha ka por kaba biang ka long kaba kongsan ban pynbeit ïa kane ka jingduna ha u budlum bad ka ban ïarap ruh ban pynkoit kaba neh slem. Kane ka rukom treikam ka ïeng kum kawei na ki kam ba nyngkong eh ban leh ha ki jaka sumar bad jaka pule doktor ka sorkar ha kane ka thaiñ shatei lammihngi, bynrap ka kyrwoh khubor.
Ha kaba ïadei bad kane u Director ka NEIGRIHMS u Dr Nalin Mehta u la ïaroh ïa ka jingpyrshang jong ka tnat Orthopaedics bad halor ka jingjop kane ka kam sumar kaba kyrpang ban pynbeit ïa u budlum ne orthopaedic spine care ha kane ka thaiñ.
U la bynrap shuh shuh ba kum kine ki kam ka pyni ïa ka jinglah kane ka jaka pule doktor ban pynïar ïa ki kam khamtam ban sumar ïa ka jingpang budlum lyngba ki jingïatreilang jong ki tnat treikam bad kumjuh ruh ka jingdon ki tiar puid kiba long katkum ka juk ba mynta.
