Shillong, Rymphang 17: Ka tnad kam jaiñ jong ka Sorkar Meghalaya ka la ïoh khusnam bad jingithuh lyngba ka KHUSNAM BA KYRPANG hapoh ki khusnam Textiles Sustainability Awards da ka Confederation of Indian Textile Industries (CITI) kaba long bad ka Bharat Tex 2025 Global Textiles Expo, ba la pynlong da ka tnad Kam Jaiñ ha Bharat Mandapam, New Delhi da ka jingpeit bniah ïa ki kam jaiñ, ka jingïaineh bad ka riam ka beit.
La pyntip da u Secretary General jong ka CITI, ba ka kynhun nongbishar, “Ka la itynnadbha ïa ki sienjam jong ka tnad kam pynmih jaiñ jong ka Sorkar Meghalaya na ka bynta ka jingkhyllie ïa ka jinghiar pateng ka kam pynmih jaiñ.” Kumba la pyntip da ka CITI, ka khusnam Textiles Heritage Reviver Award da ka CITI – Alekh ka la pynkup burom ïa ki briew bad ki kynhun na ka bynta ki sienjam ba la shim ban khyllie ïa ka jinghiar pateng ka rukom pynmih jaiñ tynrai, ka jingkyntiew ïa ka jingïaineh, ka jingwanrah ïa ka jingsaiñdur thymmai bad ka jingpynkupbor ïa ka imlang sahlang lyngba ki jingnohsynniang sha kane ka kam.”
U Bah Frederick Roy Kharkongor, Principal Secretary, ka tnad kam jaiñ Meghalaya, u la ïoh pdiang ïa ka khusnam ba Kyrpang na ka liang jong ka jylla bad ka tnad, kaba la ai da u Pabitra Margherita, Myntri Khynnah ka tnad Kam Jaiñ jong ka Sorkar India, ki ophisar ka tnad Kam Jaiñ jong ka India, Chairman CITI bad kiwei kiwei ki kynrem ki lyndan ha ka 17 tarik u Rymphang kum shi bynta ki khusnam CITI Textiles Sustainability Awards 2024-25 ha Bharat Mandapam, ha ka sngi ba kut jong ka bynta kaba ar jong ka Bharat Tex Global Textiles Expo 2025. Kiwei kiwei ki mat ba kongsan jong ka prokram ki kynthup ïa ka jinpyni ïa ki rukom treikam ba biang tam jong kiba jop khusnam bad ka Earth loom -Threads of Heritage – ka prokram pyni riam kaba rakhe ïa ki rukom thaiñ jaiñ ba ïaineh jong ka India bad ki riam jong ki nongsaiñdur ïa ki riam na kylleng ka ri ba kynthup ruh ïa ka jylla Meghalaya
Hapdeng ki sienjam ba la shim da ka tnad kam jaiñ naduh u snem 2019, ki mat ba kongsan ki kynthup ka jingpyntip bad ka jingai jingithuh ïa ka shnong Umden -Diwon ha Ri Bhoi district kum ka ERI Silk village ba nyngkong jong ka Meghalaya ha u snem 2021, ka jingsdang ïa ka Design Innovation Research Centre, (DIRC) ha u snem 2022, kaba pyni ïa baroh ki kam kiba ïadei bad ka Ryndia naduh ki jaka ri ïa ki khniang sairusom haduh ka jingpynmih ïa ka jaiñ, u ksai sha ka jain, ka jaiñ sha ka riam, ïa ki briew, ka jingkyntiew ïa ka Ryndia brand, ka jingpyrshang ban ïoh GI tag ïa ka Ryndia, ka jingsdang ïa ka Eri Corner ha ka Megh Tex, ka jingpynïoh ïa ka Silk Samagra prokram ban ai jingkyrshan ïa ki nongri ïa ki khniang sairusom, ka jingpynïaid ïa ka Integrated Textile Tourism Project ka ban wan ha Nongpoh, ka jingwanrah ïa ka rynsan e-portal na ka bynta ka Ryndia, ka jingai jingkyrshan ïa ki prokram na ka bynta ki kynhun nongthaiñ jaiñ, ka jingai jinghikai bad ka jingkyntiew ïa ka bor treikam ha ki rukom saiñdur ba thymmai, ka jingbuh jingtip lyngba ka Woven Narratives, ka jingpyni ïa ki jaiñ tynrai ha ki exhibition hapoh ka ri bad shabar ka ri, Dubai Expo, International Sericulture Commission, (ISC) Romana, Silk ha Lyon, France 2022, G20 Craft Bazar, Italy, Vietnam 2023, Bharat Tex Global Expo 2024 bad ka jingai jingkyrshan na ka por sha ka por ïa ki jaka pynmih jaiñ bad ki nongsaiñdur ba seng kam lajong ba kin ïashim bynta bad pyni ïa ki jingsaiñdur jong ki, kaba kyntiew ïa ka jingpaw ki jaiñ tynrai jong ka jylla kiba thaiñ da ka kti, ki bym ktah ïa ka mariang, kiba ai da ki rong ba ïoh na ka mariang, kiba pynïaid da ki longkmie, kiba la pynïoh ha ki rukom ba don jingbah khlieh bad ba long organic naduh ki ksai haduh ki jaiñ
Ka tnad, ki briew ba don bynta ha kane ka kam bad ki nongïatreilang kiba don ka juh ka jingmut ki bteng ban kyrshan ïa ki kam bad ki prokram kiba ai mynsiem bad kyntiew ïa ki jaiñ Ryndia jong ka jylla, ha ryngkat kiwei kiwei ki jaiñ tynrai kaba ïahap bha bad ka jingkyntiew ïa ki kam jaiñ jong ka jylla kaba dang bteng ban long ka dak jong ka jingpynneh ïa ka dustur, ka jingplie lad kamai jakpoh, bad ka jinglong jingman kaba khlaiñ jong ka mynsiem ba shlur bad ka jingtbit jong ki longkmie jong ka jylla kiba thaiñ jaiñ bad bad pynmih tiar.
