Shillong, Nohprah 06: Ka Captain Williamson Sangma State University ha ka sngi Thohdieng ka la ïoh ïa ka jingithuh napoh ka University Grants Commission (UGC).
Ïa kane la pyntip lyngba ka shithi ba la pynmih da Deputy Secretary sha ka Ministry of Education u Dr Amol M Andhare bad kumjuh ruh kaba la phah sha Registrar ka Captain Williamson Sangma State University.
Lah ban ong ba ïa ka Captain Williamson Sangma State University la thaw da ka sorkar jylla, kaba long ruh kum ka State Public University lyngba ka Captain Williamson Sangma Technical University (Amendment Act, 2003 (Meghalaya Act No 12 of 2023) hadien ba la pynkylla thymmai ïa kane ka aiñ.
La ong ruh ba ïa ka kyrteng jong kane ka University la kynthup ïa ka thup kyrteng jong ki skulbah (Universities) kaba la thaw hapoh ka Section 2(f) jong ka UGC Act, 1956.
Halor ki bynta kiba dei ban bud da kane ka skulbah ha ka shithi la ong ba kane ka University la pynkupbor ba ka lah ban sam ïa ki khusnam ne degree kumba la bthah hapoh ka kyndon jong ka UGC kaba hab hapoh ka section 22 jong ka UGC Act 1956 da kaba pynlong ïa ki course lyngba ka tnat la jong, ki jaka pule kiba pynïasoh lane lyngba ki affiliated college kaba dei ban long barabor. Ha kawei pat ka liang ka jingpynlong ïa kane ka jaka pule kaba dei ban long kumba ki dei ban don ki jingai jinghikai kiba biang ba kynthup ruh ïa ki technical bad ki prokram medical kiba dei ban ïoh lyngba ki Regulatory Councils ne Commissions. Kum kine ki prokram dei ban pynïaid lyngba ki kyndon jong ki Regulatory Councils/Commissions bad ba la mynjur da ki Council/Commission jong ki, kiba dei ban long kumba la buh.
Ka la ong ba kane ka skulbah kan ai ïa ki khusnam tang ïa ki degree ba la pynithuh da ka UGC. La ong ruh ba kane ka University ka donkam ban bud ïa ki jingpynbna kumba la buh da ka UGC (Notification) ha kaba ïadei bad ka jingpynbna jong ka Degree 2014 bad ki jingpynkylla thymmai jong ka, kaba la pynmih na ka por sha ka por kaba long katkum ka thup ba la pynskhem da ka UGC kaba ïaid lang hapoh ka kyndon Section 22 jong ka UGC Act, 1956 kaba la pynbiang ïa ki kyndon bapher bapher.
La ong ruh ba ïa kane ka jingpynbna lah ban peit hapoh ka UGC webside www.ugc.gov.in hapoh ka link https://www.ugc.ac.in/pdfnews/1061840_specification-of-degree-july-2014.pdf.
Kane ka skulbah kan treikam tang hapoh u pud u sam ba la buh hapoh ka Act bad kam dei ban ïaid shabar jong ka jylla kumba la pynbna ïa ki rukom treikam jong ka. La khang ïa kane ka skulbah ban sdang ïa kano kano ka off-campus centre shabar u pud u sam jong ka kaba dei ruh kumba la pynbiang hapoh ka Act bad kane ruh ka dei hapoh ka jingbishar jong ka Supreme Court ha kaba ïadei ba ka mukotduma Prof Yash Pal vs State ka Chhattisgarh.
La khang ruh ban sdang ïa ka Open bad Distance Learning programme bad ki on-line programme khlem da la ïoh ïa ki jingpynskhem na ka UGC. Ïa ki kyndon ha kaba ïadei bad kane ki la don hapoh ka UGCwebsite www.ugc.gov.in
Kane ka skulbah ka dei ban pynthikna ba kam dei ban don ka jingshah ha kaba ïadei bad ka higher education watla ka dei ruh ha ka bynta jong ka jingpule kaba kham shalor. Lada ka skulbah ka la sdang ïa kano kano ka campus ne study centre shabar jong ka jylla kadei ban khang noh mardor.
Kane ka skulbah ka dei ban bud ïa ki kyndon kumba la bthah hapoh ka University Grants Commission (Minimum Standards and Procedures for Award of Ph.D Degree) Regulations, 2022 bad kaba la pynkylla na ka por sha ka por.
La bthah ruh ba kane ka skulbah ka dei ban thung ïa u Ombudsperson kaba ïadei bad ka UGC (Redressal of Grievances of Students) Regulations, 2023 na ka bynta jong ki jingeh ba la mad da ki samla pule hapoh ki ar bnai kaba ïaid lang katkum ki jingïaid jong ka jingpule. La ong ba ia ka UGC (Redressal of Grievances of Students) Regulations, 2023 ki la don hapoh ka UGC website ha link https://www.ugc.gov.in/pdfnews/4675881_Regulation.pdf. Ïa kine ki jingtip ba bniah halor u Ombudsperson dei ban pynpaw hapoh ka website jong ka skulbah bad ba dei ban phah sha ka UGC.
La bthah ïa kane ka skulbah ban bud ïa ki jingbthah jong ka UGC ha ki Public Self Disclosre da ki jaka pule kiba kham shalor kiba la don ruh hapoh ki jingbthah hapoh ka UGC website.
Kane ka University ka dei ruh ban ïoh ïa ka jingithuh ne accreditation ba donkam napoh ka NAAC.
Ka skulbah ka dei ban pynrung kyrteng bad ban pynrung ïa ki jingtip ba bniah jong baroh ki samla pule hapoh ki Academic Bank of Credits (ABC) bad National Academic Depository (NAD) portals jong ka Ministry of Education, ka sorkar pdeng.
