Ioh jingïaroh ka Sohra College kum ka shlem jingkyrmen ïa ki samla pule ha jingdap 44 snem

Sohra, Naitung 10 : Ka Sohra College ha ka sngi Palei ka la rakhe ïa ka jingdap 44 snem ka jingshakri ïa ka thain Sohra baroh kawei, ha ka jingïalang kaba shongkun bha kaba la pynlong ha phyllaw jong ka College hi.

La donlang ruh ha kane ka sngi khraw naduh u SDO jong ka Sohra Civil Sub-Division Bah MA Challam kum u Kongsan nangta u Sirdar ka Elaka Saitsohpen Bah D Kynta kum u Symbud Kongsan, nangta ki nonghikai ki samla pule bad kiwei kiwei.

U Kongsan ha ka jingkren, u la ai ka jingïaroh ïa ka jingkiew stet jong ka Sohra College kaba long kum ka shlem kaba saindur ïa ki samla pule ka thain naduh ba seng ïa ka 44 snem mynshwa.

U SDO u la ai ruh ka jingïaroh ïa ka jingaiti lut bad ka jingnoh synniang kaba khraw jong ki nonghikai na bynta ban kyntiew ïa kane ka College. U la kyntu ruh ïa ki samla pule ba kin bud lang katkum ka jingïaid ka por ba kin kiew ha ka jingim da kaba shim kabu ïa ka jingnoh synniang jong ki nonghikai.

Na ka liang u Symbud Kongsan pat u la pynkynmaw ïa ka jingïaid lynti jong kane ka College na i iingrit ha ka por ba sdang bad sha ka jaka pule kaba paka ba ki don mynta.

Ha kane ka sngi la pynkup burom ïa ki nonghikai kiba la dep ban shakri palat 25snem khlem kynran dien. La pynshongshit da ki jingtem jingput, ki jingrwai bad ruh ki jingshad na ki samla pule.

Ka la don ruh ka jingpynkup burom kyrpang ïa u Ïaikyrshan Lyngdoh Mawphlang uba la mihkhmat ïa ka College bad ïa ka Meghalaya Battalion NCC Shillong Group ha ka Republic Day Parade ha New Delhi.