Ïoh jingïarap ki khynnah ba don ha ka jinglong kyrpang ha ka jingdap 5 snem ka NEP 2020
Jowai, Naitung 29: Ka ophis jong ka District Mission Coordinator, SSA ha ryngkat ka District School Education Officer bad ka District Project Coordinator (RMSA) West Jaiñtia Hills, ha kane ka 29 tarik mynta u bnai ka la leh burom ïa ka jingdap 5 snem ka jingïaid lynti ka National Education Policy (NEP) 2020, da kaba pynlong ïa ka jingïakynduh lang ba kyrpang ha Inclusive Education Resource Centre, Mihmyntdu, ha ka jingdonlang ka kong C. Lyngdoh, BMC-Thadlaskeiñ Block bad ka D. Lathong, BMC-Laskieñ Block.
Ha kane ka prokram ïakynduhlang la wan ban ïashim bynta da ki khynnah kiba donkam ban ïoh jingïarap kyrpang (CWSN) kiba dei napoh ka Thadlaskeiñ bad ka Laskeiñ Block, katba na ka bynta ka Amlarem Block ïa kane ka prokram la dep ban pynlong ha ka 24 tarik u Naitung, 2025.
Kane ka dei ka prokram kaba wan lyngba ka Akhil Bharatiya Shiksha Samagam (ABSS) 2025 ha ka thong jong ka 5th Anniversary of National Education Policy (NEP) 2020, Distribution of Aids & Appliances for Children with Special Needs (CWSN).
Ha ka jingïalang ba lyngkot mynta ka sngi la pynïaid da ka R. Plain, IE Volunteers Laskieñ Block, la ïoh ka jingkren lam khmat halor jong kane ka prokram da u L.K. Singh, IE Coordinator SSA, West Jaiñtia Hills bad ka jingren ai mynsiem na ka kong C. Lyngdoh, BMC-Thadlaskeiñ Block sha ki kmie, ki longkpa jong ki khun kiba don ka jinglong kyrpang
Shuh shuh ka kong C. Lyngdoh ka la pynpaw ka jingsngewnguh bad sngewburom ïa ki longkmie bad ki longkpa kiba la shim ka jingkitkhlieh, na ka bynta ki khun ki kti jong ki kiba donkam shisha ban ïoh ka jingïarap ba kyrpang.
Ka kong C. Lyngdoh ka la pynsngew ba ka sorkar ka don ïa ka thong ban kyntu kynrong ïa ka pule ka puthi jong ki khynnah kiba donkam ban ïoh jingïarap kyrpang. Na ka liang jong ka ruh ka la pyrshang ban wad ki lad ki lynti ban leh ïa kaba bha tam na ka bynta kitei ki khynnah, ha ka juh ka por ka khot lang ïa ki kmie ki kpa ban ïatreilang na ka por sha ka por.
Haba pynkut ka buh ka jingkyntulang ïa ki longkmie bad ki longkpa ba kin pyndonkam hok ïa kitei ki tiar kiba la sam mynta ka sngi, khnang ba kan long ka jingmyntoi ïa ki khun jong ki ym ban pyndonkam bakla ïa ki.