Ïoh jinghikai ki samla pule halor ka National Webinar ba la pynlong ha KNGC Jowai

Jowai, Naiwieng 08: Ïa ka National Webinar halor ka “Education – A Life Skill Under NEP 2020” la pynlong ha ka sngi Palei, da ka Association of Mutual Funds in India (AMFI) bad ka Kiang Nangbah Government College, Jowai. Kane ka program ka long shi bynta ban kyntiew ïa ka jingnang jingstad ha ka liang ka pisa tyngka bad ban pynsngewthuh shaphang ka jingkynshew spah kum ka jingnang jingstad ha ka jingim.
Ïa kane ka webinar la plie da u ma H. Toi Head jong ka Commerce Department ha KNG College, Jowai uba la ai ruh ki jingkren plie ha kane ka sngi, katba u Surya Kant Sharma uba dei u Senior Consultant haka AMFI, haba kren u la ban jur ïa ka jingdonkam jong ka jingshngaiñ ha ka liang ka pisa tyngka, da kaba kyntu ïa ki nongïashim bad nangta ban pynleit jingmut ha kumno ban kynshew ïa ka spah lyngba ka jingbuh pisa bad jingbei tyngka man ka por.
U Sharma ula ïakren ïa ki lad bei tyngka bapher bapher kiba lah ban ïoh, kynthup ïa ki bond sorkar, ki PPF, NPS, bad kiwei de, da kaba pynpaw ïa ka jingdonkam ban jied ïa ki jingbei tyngka na kiba lait na ki jingma. Ula maham ruh ym dei ban shu kynshew pisa ha kino kino ki organisation khlem ka jingtip kaba biang bad u la maham pyrshah ïa ki skim kiba don jingma, ki bym don aiñ kum ka Ponzi bad ki chit fund kiba la wanrah ïa ka jingduhnong kaba khraw ha ka liang ka pisa tyngka.
Ha kane ka sngi la don ruh ka jingbatai halor ka skhim penshon (NPS) kaba la ïashim bynta da ki riew shemphang. Ïa kane ka jingïalang la pynkut da ka jingkylli bad jubab, ha kaba ki riew shemphang ki la jubab ïa ki jingkylli jong ki nongïashim bynta halor ka pisa tyngka.