Khliehriat nailar 14: Kum ka jingpynshai sha ki paidbah khamtam ki samla jong ka East Jaiñtia Hills District ka ophis jong u Vice-Principal Industrial Training Institute (ITI), Khliehriat ha ryngkat ka jingïatreilang bad ka ophis jong u Assistant Employment Officer, District Employment Exchange, East Jaiñtia Hills District mynta ka sngi ka la pynlong ïa ka jingpyni nam bad ka prokram jingpynshai, ka Awareness cum Exhibition halor ki jingai jinghikai ne ki vocational training bad ki jait skim bapher bapher ban kyntiew ïa ki sap ki phong, ïa kane ka prokram la pynlong ha phyllaw jong ka Industrial Training Institute (ITI), ha Khliehriat.
Haba kren ha ka jingïalang ha katei ka Awareness Cum Exhibition prokram ka Additional Deputy Commissioner, East Jaiñtia Hills District, ka kong J. U Kharpuri, MCS ka la ong ba kane ka prokram ai jingpynshai kaba la pynlong mynta ka sngi ka long kum ka jingiasyllok lang halor ki lad iohkam iohjam jong ki samla jong ka district bad ruh kaba don ka jingthmu ban pynsngewthuh ïa ki paidbah khamtam ki samla bad ki khynnah pule halor kiba bun jait ki skim sorkar bad ki lad ai jinghikai ne ki vocational training kiba lah ban ioh na kane ka shlem ai jinghikai ha ka Industrial Training Institute (ITI), Khliehriat ka ban long ka jingmyntoi ïa ki samla ha ka iohkam iohjam ha ka lawei jong ki.
Haba kren halor ki lad ai jinghikai, ka kong J.U Kharpuri ka la pynsngew ïa ka jingdonkam ban don ki sap ki phong ne kita ki additional skills nalor ki jingioh jinghikai na ka bynta ka iohkam iohjam, ka la kyntu ruh ïa ki samla jong ka district khamtam kito kiba la pep skul noh shiteng ba kin shim ïa kane ka lad ka kabu ban wan sha kane ka shlem ai jinghikai ha Khliehriat bad ruh ba kin wan ban pynrung kyrteng noh ha kane ka ITI, ha kajuh ka por ka la ai ka jingkyrmen ïa kito kiba dang shah hikai ba kan sa don ka lad ioh kam ïa ki hadien ba ki la pyndep ïa ka jingshah hikai.
U Vice-Principal, Industrial Training Institute (ITI), Khliehriat, u bah G. Sohshang u la ong ba ka jingthmu jong kane ka prokram ka long ban pun lynti ne ka jingïadei halor ka jingdon ka mynsiem ban trei ban ktah bad ki lad iohkam iohjam bad ruh ban pashat jingtip ïa ki khun samla jong ka district ha kaba ïadei bad ki lad ban kyntiew ïa ki sap ba ki don kata ka skill-based training prokram kaba lah ban ioh na kane ka shlem ai jinghikai.
U Vice-Principal, Industrial Training Institute (ITI), Khliehriat, u la ai jingpynshai ruh halor ki jait jingkhaïi kiba lah ban ioh na kane ka shlem ai jinghikai bad kiba shah hikai ki ioh ruh ïa ka jingsiew da ka monthly stipend ha kaba kito kiba la pyndep ïa ka klas VIII ki ioh T600 tyngka bad kiba pyndep ïa ka klas X ki ioh T800 tyngka.
U Assistant Employment Officer, District Employment Exchange, East Jaiñtia Hills District, u bah Donkupar Mairom u la pynshai halor ka jingmyntoi kaba ioh na kaba pynrung kyrteng ha ka tnat District Employment Exchange kaba lah ban iarap ha kaba wad ïa ki lad ki lynti ha ka iohkam iohjam.
Hadien ka jingïalang baroh kiba la wan sha kane ka prokram ba kynthup ruh ki khynnah skul bad ki paidbah ki la leit jngoh ïa ki kamra klass ba ju ai jinghikai ba kynthup ruh ki kamra Computer Operator Programming, Assistant (COPA), Wireman, Driver Cum Mechanic (LMV), Surface Ornamentation Techniques (Embroidery) bad Cosmetology bad la pynlong ruh ïa ka jingpynrung kyrteng ïa ki samla ha kane ka shlem ai jinghikai ka Industrial Training Institute (ITI), Khliehriat.
Nalor ki samla ba shah hikai, kiba la ïa don ryngkat lang ha kane ka prokram ki kynthup ruh ki nonghikai, ki khynnah skul , ki nongpynïaid shnong bad kiwei kiwei ki riew rangbah.
