Ïoh jinghikai ki ophisar MCS ba dang thymmai halor ki kam thaw aiñ ka jingsynshar paidbah

Shillong, Jymmang 22: U Commissioner & Secretary ka Ïingdorbar Thaw aiñ u Dr Andrew Simons ha ka sngi palei u la ai ïa ka jingbatai ïa ki ophisar Meghalaya Civil Service (MCS), kiba thymmai jong ka kynhun u snem 2025, ha ka Induction Training Programme (ITP) jong ki kaba la long ha Meghalaya Administrative Training Institute (MATI), Mawdiangdiang, Shillong.
Ka jingkren jong u ka long halor ki kam thaw aiñ ne legislative process kaba ha Parliament bad ka jingthmu ban pyntip ïa ki officer haba ïadei bad ki kam thaw aiñ bad ki jingdon bynta jong ki ban kyrshan ïa ka Assembly. Na ka liang u Dr. Simons u la pynshlur ruh ïa ki ophisar ba kin don bynta bad ki kam thaw aiñ kiba don bynta ruh ha ki kam synshar paidbah.
Kane ka prokram ai jinghikai ha MATI ka long ban pyntbit ïa ki officer shaphang ki jingtip haba ïadei bad ka synshar ka khaddar, ki kam shakri paidbah bad ban pynthikna ruh ba kin long kiba la khreh ban kynduh ïa ki jingdawa jong ki paidbah haba ïadei bad ki kam synshar khadar.
Hadien kane ka jingshah hikai, ki MCS ophisar ki la leit jngoh ruh ïa u Lamphang ka Ïingdorbar Thaw aiñ u Thomas A. Sangma, hapoh ka kamra treikam jong u ha Assembly Secretariat, Shillong. Na ka liang u Lamphang u la pdiang sngewbha ïa kine ki officer, ha kaba u la aiti ruh ïa ka shithi ka jingïaroh bad sam ruh ïa ki kyntien jingpynshlur. Kane ka jingïasyllok ka la ailad ruh ïa ki ophisar ban ïoh ki jingpynshai halor ki kam thaw aiñ bad kiwei pat ki kam.
Haba bynrap ïa ki jingbatai ha ki kamra klas, kine ki 35 ngut ki MCS ba la ïoh ki jinghkai ki la leit ruh dangshen ban jngoh sha ki district bapher bapher jong ka jylla. Kane ka jingleit jong ki, ka la ailad ruh ba kin tip shaphang ki kam pynïaid distrik bad kiwei kiwei ki kam.
Kane ka prokram pynrung kam kadei ruh kum shi bynta jong ka sorkar ban ai ka jinghikai kaba biang bha ïa kine ki ophisar haba ïadei bad ki kam jong ka sorkar.
Na ka liang u Dr Simons u la banjur ruh halor kiba bun ki kam thaw aiñ, ka jingïadei para ophisar bad ki nongmihkhmat kiba la shah jied, nalor kiwei kiwei.