Ïoh jinghikai ki nongrep na ka ophis KVK ha ka sngi rakhe ïa ka Poshan Abhiyan ha Wahiajer

Jowai, Nailur 20 : Ka ophis jong ka Krishi Vigyan Kendra (KVK) Jaiñtia Hills kala rakhe ïa ka ‘Poshan Abhiyan’ bad pynlong ruh ha jingthung tynrai dieng dang shen ha phyllaw ka KVK Moopun, Wahiajer West Jaintia Hills District.
Hashwa kane la don ka jingïalang ba la pynïaid da u Dr D Pasweth, Senior Scientist and Head, KVK Jaiñtia Hills, uba la ai ruh ki kyntien pdiang sngewbha ïa ki nongrep kiba la poi sha kane ka prokarm bad ula kren ruh shaphang ka Ministry of Women and Child Development shi bynta na ka jingrakhe ba san jong ka Rashtriya Poshan Maah 2022 kaba la sdang naduh ka 1 tarik u September haduh ka 30 tarik u September 2022, kaba long katkum ka thong jong ka sorkar kmie ban rad diengkhong ïa ka jingthngan bad ka jingduna bam.
Shuh shuh ula pyntip ba ïa ka Poshan Abhiyan la plie da u Myntri Rangbah duh ka Ri ha ka 8 tarik u March 2018 ha Jhunjhuna District jong ka jylla Rajasthan bad kane ka Abhiyan kan peit bniah halor ka jingdonkam jong ka bam ka dih jong ki khynnah kynthei (adolescent), ki longkmie ba armet, ka jingbym biang ka bam ïa ki longkmie bad ki khynnah kiba hapoh 6 snem ka rta.
Ula ong ruh ba ka jingthmu jong kane ka Poshan Abhiyan ka long ban ïada ïa ki longkmie bad ki khynnah hapoh 6 snem ba kin lait na ka jingduna ha ka bam ka dih bad ka jingkhia ha ka bor met, kumjuh ka jingduna snam ha kito kiba don ha ka rta kaba 15-49 bad kumjuh ka jingduna palat ka jingkhia jong ki khyllung ba dang kha.
Ka kong Amita Phawa, President jong ka shnong Ledong organization, Wahiajer ha ka jingkren kala batai shaphang ka jingdonkam jong ka kam rep kam riang katkum ka jingtip (experience) kiba kala ïoh.
Ha kane ka sngi la ïoh ruh shibun ki jingbatai ba bniah shaphang ki rukom rep, ka rukom song ïa ki mar rep bad kiwei kiwei de, kiwei de kiba ai jingbatai ki kynthup ïa ka kong A. Dympep, Subject Matter Specialist (Agril. Extension) KVK Jaiñtia Hills kaba la batai sha ki longkmie ban donkam ban thung ïa ki jhur ba tei met ha ki phyllaw ïing, Dr. R. Suchiang, Subject Matter Specialist (AH & Vety), KVK Jaintia Hills iba la batai halor ka jingdonkam ban bam ïa ka pylleng. Katba ïa ka jingai jinghikai halor ka ‘bio-fortified crop varieties in nutrition’ la ai da ka kong D Lyngdoh, Programme Assistant (Tech), KVK Jaiñtia Hills.
Na ka liang ki nongrep kiba la poi sha katei ka prokram kila ïoh ka lad ban ïa phylliew jingmut lang na ka bynta ki jingtip ba khambniah, la pynkut ïa ka prokram da kaba sam ruh ïa ki symbai sha baroh ki nongrep kiba la wan ban ïashim bynta.