Jowai, Rymphang, 12 : Ka Urban Primary Health Centre, Loomkyrwiang ha ka taiew ba la dep ka la pynlong ïa ka prokram ai jinghikai ne ka ‘Orientation Programme’ ba kyrpang ïa ki dkhot ka Mahila Arogya Samiti.
Ka jingthmu jong kane ka prokram la long shi bynta ban ïoh ïa ka rukom treikam kaba ïajan bad ka jingïasngewthuh jingmut hapdeng ki briew jong ka UPHC, ki ASHA bad ki Dkhot ka Mahila Arogya Samiti kiba don ha ki shnong babher bapher.
Ha kane ka sngi ïa ki kyntien ai khublei la ïoh na u Dr. W. Suna, Medical Officer i/c UPHC, Loomkyrwiang, kiwei de kiba ai jingkren ki kynthup ïa ka Marsalan Toi, ANM UPHC, Loomkyrwiang kaba la ai jingkren shaphang ki dak ki shin halor ka jingpang Leprosy. Ka M.F. Tariang, Staff Nurse UPHC Loomkyrwiang ka la ai jingbatai shaphang ka Nongrim treikam jong ki Mahila Arogya Samiti, katba ka Syiemki Pakynteiñ, Office Clerk ka la ai jingbatai shaphang ka Untied Funds.
Ha kane ka sngi la wan ban ïadonlang naduh ka Dr. Bhawya jong ka WHO Delhi, shuh shuh ka la ai jingbatai shaphang ki jait jingpang kiba donkam bha ban shimkhia kyrkieh lyngba ki Community Health Worker.
Ka la buh ka jingkyntu, donkam ban ai jingtip lem sha kiwei de ki shnong na ka bynta ban ai injek tikna ïa ki khunlung, ki longkmie katkum ki jingbuh beit buh ryntih jong ka tnad ka koit ka khiah, ka la kyntu ba ym dei ban kheiñsting lada don kino kino ki dak ki shim jong ka jingpang prie, pynhiar, ka jingpang jem shyieng, ka jingpang khieshohrieh, ki kynja ba mih haka met ka phat jong ki khynnah, da kaba leit mih mar mar sha ki jaka sumar khnang ba kin ïoh leh ïa kaba donkam haka por kaba biang.
