Jowai, Naiwieng 14: Ki 20 ngut ki nongshna khiew khyndew ki la ïoh jinghikai na ka prokram ai jinghikai kaba shibnai hapoh ka Handicraft Promotion Scheme jong u snem 2023-2024 kaba la pynïaid da ka kong Helme Shylla kaba la ïoh ïa ka khusnam jong ka Jylla (2022-23) ha ka jaka ai jinghikai shna khiew jong ka ha ka shnong Tyrshang, West Jaiñtia Hills.
Ha ka sngi pyndep ïa kane ka jingai jinghikai la sam ïa ki syrnod bad ki tiar ki tar sha ki 20 ngut ki nongshah hikai da u General Manager jong ka District Commerce and Industries Centre, Jowai u Bah B. Warjri bad ka kong S E Kharpran, Functional Manager ka DCIC, Jowai. Ha kaba ïadei bad kane na ka liang u Bah B. Warjri, haba ai jingkren ula pynshlur ïa ki nongshah hikai ban pyndonkam ïa ki sap ba la ïoh, da kaba pynksan ïa ka jingdonkam ban pynneh pynsah ïa ki kam shna jingshna tynrai.
Ïa kane ka jaka hikai shna khiew jong ka kong Helme Shylla la bei pisa da ka tnad Directorate of Commerce and Industries, Meghalaya Shillong hapoh ka skhim Handicraft Promotion Scheme 2023-2024.
