Shillong, Ïaïong 18: Ka Kong Ibakyntilin Mary Umdor ka longkmie kaba la shah kyntait kha khyllung ha Ganesh Das Hospital kala ïoh ïa ka jingbishar kaba hok ha kaba ka Ganesh Das kala shah rai rem ha ka Human Rights Commission bad kala hap ban siew 3 lak tyngka sha katei ka longkmie.
Ka Kong Ibakyntilin Mary Umdor kaba shong ba sah ha Mawlai Mawtawar kadei ka longkmie kaba la shah kyntait kha khyllung ha ki bor pynïaid jong katei ka hospital ha ka 28 tarik u Naitung jong u snem 2020 kaba dei ruh ka por ba ka jylla ka don hapdeng ka jingkhang dam na ka daw ka khlam jingpang COVID. Bad ha katei ka jingjia na ka liang ka HYC Mawlai Circle hadien ba kala ïoh jingujor na katei ka longïing bran bran kala leit ban tuklar ban ïakren bad ki bor pynïaid ban ai jaka ïa kane ka longkmie ban kha ïa i khyllung. Hynrei sniewbok namar ka jingbym ïoh ïa ka jingsumar ha ka por kaba biang i khyllung ila khlad noh ha ka sngi.
Ka hospital kala kyntait da kaba aidaw ba ka hospital kam don jaka shuh bad namar ba ka Kong Ibakyntilin ka wan na ka containment area. Hynrei na ka jingtuklar jong ka HYC ki bor pynïaid jong ka hospital kila pdiang. Haba kren sha ki lad pathai khubor ha ka 16 tarik Ïaïong ka Kong Ibakyntilin Mary Umdor kala pynpaw ka jingsngewnguh ïa kiba la ïarap ban kyrshan ïa i bad khamtam eh ïa ka HYC kaba la tuklar ïa kane ka kam naduh kaba sdang haduh ba kan da ïoh ïa ka jingbishar kaba hok. Ka la ïathuh ruh ba ïa kane ka pisa kala ïoh pdiang dang ha kine ki khyndiat sngi.
Katba na ka liang ka HYC Mawlai Circle ka pynpaw ka jingsngewkmen hadien ar snem ba kala ïakhun mynta kane ka longkmie kala ïoh ïa ka jingbishar kaba hok. U Bashan Lyngdoh GS ka HYC Mawlai Circle u la kyntu ruh ïa kiwei ki hospital ba kim dei ban kyntait ïa kiba wan phah sumar la ka long ïa ki nongthiah pang lane kiba wan kha khyllung. Haba bynrap lang halor kane na ka liang u Bah Donboklang Kharlyngdoh u la ïathuh ba ka jingkyntait jong ki hospital ban pdiang ïa ki longkmie ba armet ka wanrah ka jingïap jong kiba bun ki longkmie bad ki khyllung, kumta u la ong ba kane ka long ka jinghikai ïa kiwei pat ki hospital da kaba kyntu ba kim dei ban ap haduh ban da wan ki seng bhalang lane kiwei kiwei ban pdiang ïa ki nongpang ne ki longkmie kiba armet.
