Shillong, Rymphang 25 : U Myntri Rangbah ka Jylla Conrad K Sangma mynta ka Sngi Balang ula pyntip ba ka sorkar ka la ïoh ïa ka jaka ban theh niut ba thymmai kaba heh 7.28 hectare ha Riat Khwan Reserve Forest kaba aiwai mynshuwa. U la pynthikna mynta yn pyndonkam kum ka jaka theh niut ne ka Marten hadien ba la ïoh jingbit na ka Sorkar Pdeng kat kum ka Forest (Conservation) Act, 1980.
“ïa ka jingpynthikna la leh hadien ba ïoh ïa ka jingbit ban pynkylla ïa ka jaka khlaw sha ka jaka ban pyndonkam sha kiwei pat ki kam” ong u Myntri Rangbah haba jubab ha ïing Dorbar Thaw Aiñ. U la pyntip ïa ka jingai jingbit ba khatduh jong ka Ministry of Environment and Forest ha ka 21 tarik Naiwieng 2011. Ula pynthikna ba ïa ka jingaiwai lah nang pynjlan haduh u snem 2026, halor ki kyndon kiba pyrrkhing bha.
“Ka jaka kan ïai bteng ban long ka jaka Reserve Forest” ula ong haba bynrap ba ka jingpyndonkam kan long beit thik tang ïa ka jingbret niut” bad kam dei ban don ka jingdie, jingaiwai, ne buh bynda lane pyndonkam ha kiwei pat ki kam khlem da ïoh jingbit shuwa na ki bor ba dei khmih”.
