ïoh ïing ka longkmie ba shem jynjar bad lai ngut ki khun ba synñiang u MLA Mawkynrew

Shillong, Nohprah 05 : U Bah Banteidor Lyngdoh, MLA ka Mawkynrew ha ka 05 tarik u Nohprah, 2022 u la aiti ïa ka ïing kaba u la synñiang pisa ban shna sha kawei ka longkmie kaba shem jynjar ha ka shnong Maw U Sam, kaba don ruh lai ngut ki khun kiba dang khynnah rit.
Katei jingpynshna ïing da u MLA na ka bynta katei ka longkmie ka dei hadien ka jinglap jong u ha ki bnai kiba la dep ïa ka jingjot palat ka ïing ba ka shong ka sah bad ki khun jong ka khamtam.
Sa kawei pat ka jingjia kaba la nang ban sohsat ha katei ka longkmie ka dei ka jingkhlad kyndit u kpa kitei ki khynnah katba u dang pynsum ïa ki jingri ha kawei ka wah hajan katei ka shnong ym pat da slem than.
Kumta katei ka longkmie kam don lad shuh ban dang shna ïing sah bad hap ban shu shong khapngiah bad la ki khun ha i ïing ba la i sangsot bha kaba don hajan katei ka ïing kaba thymmai.
Ha ka jingïalang ba lyngkot ban aiti ïa ka ïing sha ka katei ka longkmie, u Bah Banteidor u la ong ba um kwah ban ong eiei shuh ha ka por ba u lap ïa katei ka longïing kaba jynjar bad u la shim rai ban pynshna beit da ka ïing na ka bynta jong ki.
U la ong ba ki don bun tylli ki ïing kiba u la pynshna da kaba pynlut na ka tulop bad na pla lajong na ka bynta ki longïing kiba shem jynjar ha kylleng ka Constituency bad u la ong ba un dang ïai bteng ban leh ïa kum kine ki kam leh isynei na ka bynta kiba duk ba jynjar.
La ïa sakhi lang ïa kane ka sngi da ki ba haïing jong katei ka longkmie bad ki khun, ki nongïalam shnong, ki nongkitkam bad nongïatreilang bad u Bah Bantei, ki dkhot bad bor pynïaid ka Balang Presbyterian Maw u Sam kiba la ai jingrwai ainguh sha u Blei bad ki jingduai.
Katei ka longkmie ka la pynpaw ka jingai khublei kyrpang ïa u MLA uba la phai khmat ban ïarap ïa ka ha ka jingeh kaba ka don da kaba ïathuh ruh ïa la ka jong ka jingshem jynjar.