SHILLONG, Risaw 08: Watla ym shym la don ki nongïalehkai Meghalaya kiba la shah jied ban don ha ka kynhun Badminton jong ka ri India na ka bynta ka Yonex Sunrise BWF World Junior Championship 2025, hynrei ka long pat ka jingsarong ïa ka jylla ban don pat ïa hynñiew ngut kiba la mihkhmat kum ki Technical Official ban peitngor bad bishar ïa ki jingïakhun jong kane ka Championship.
Kine ki hynñiew ngut ki Technical Official ki kynthup ruh ïa kawei ka nongïalehkai Badminton ba pawnam jong ka jylla ha ki por mynshwa, ka Kong Balarina Syiem, kaba la kylla long ka International Badminton Umpire bad kaba la ïoh ruh ban pynïaid ïa ki jingïalehkai kum ha ka French Open (Badminton).
Kiwei pat ki long ka kong Eranicle Syiem, bah Rimanbha Lyngdoh, Bah Badonboklang Marwein (Nongstoiñ), bah Pynkhlain Marwein (Mawkyrwat), Bah Sobin K Sangma (Tura) bad u bah Raju Thingbaijam, Shillong.
Kane ka championship kaba la wanphai biang ha India hadien 17 snem, yn pynïalehkai ha ki ar bynta (2 phase) naduh ka 06 tarik haduh 19 tarik Risaw, 2025, bad la pynlong ïa ka ha National Centre of Excellence, ha Guwahati. Ka bynta kaba nyngkong yn ïohi ïa 36 tylli ki kynhun kiba ïakhun ban ïaknieh ïa ka Suhandinata Cup ha ka Mixed Team championship bud sa ka Individual Championships na ka bynta ka Eye-Level Cup.
Haduh mynta ka India ka la khur 11 tylli ki takma ha ki jingïalehkai kaba para marwei ha ka histori jong kane ka lympung, ha kaba ka lympung kaba seisoh tam jong ka ri ka la wan ha Pune 2008 ha kaba ka la ïoh ban khur ïa ka takma ksiar bad takma rupa.
Mynta u snem ka India ka la shah pynngat ha ka Group H, ryngkat ka UAE, Sri Lanka bad ka Nepal bad kan ïakhun ha ka rukom pynïaid kaba thymmai na ki lai tylli ki set ha kaba kawei pa kawei ka set kan long ka jingïakhun ban ïoh kamai ïa ki 45 poiñ.
