Nongpoh, Nailur 23: Ka Party HSPDP ha Umsning Constituency ka la dang ioh bor katba dang mih ki sngi kum ka jingpynkhreh na ka bynta ka election 2023 hapoh ka jylla bad ïa kane la sakhi mynta ka sngi ha kaba ki heh nongïalam ka National People’s Party (NPP) ki la wan ban pynïasoh noh sha ka party HSPDO ban kyrshan ïa u Bah Primson Makdoh kum u kyrtong ka HSPDP na Umsning Constituency.
Kine ki heh nongïalam bad ryngkat ki spah ngut ki nongkyrshan ka NPP ki la wan ban pynïasoh sha ka HSPDP party ha Umsning, ka dei hapoh ka jingïalam u Bah Tarson Nongkseh kum u Working President ka NPP na Umsning Constituency, u Bah S.P Nongbet, Treasurer, u Bah Donbor Marbaniang, Organizing Secretary bad u Samla Ribok Kharprah kum u President ka NPP Youth Wing na Umsning Constituency.
Ïa kine ki nongïalam bad ki nongkyrshan ka NPP la pdiang burom sha ka party HSPDP da u President ba rangbah, u Bah P.K Pangniang ha ryngkat ka jingdon lang u Senior Vice President bad uba dei u MDC ka Mawkynrew, u Bah Martel Mukhim, u District President ka HSPDP na Ri Bhoi, u Bah P.B Sylliang, u kyrtong ka HSPDP Umsning, u Bah Primson Makdoh bad kynthup kiwei kiwei ki nongïalam ka party HSPDP na ka jylla bad na Ri Bhoi District.
Kaei kaba la ai mynsiem bad dang pynkhlaiñ bor ïa u kyrtong ka HSPDP, U Bah Primson Makdoh ha kane ka sngi, ka dei halor ka bynta ba kitei ki nongïalam ka NPP hadien ba la pynïasoh sha ka party HSPDP ki la ai ruh ka jingkular ban dang trei shitom na ka bynta ban pynjop don burom ïa ka party HSPDP na Umsning Constituency.
Haba kren ha kane ka sngi, naduh u president ba rangbah ka party HSPDP, U Bah P.K Pangniang, u Bah Martel Mukhim, uba dei u Senior working President bad kiwei ki nongïalam ki la kren halor ka nongrim ka HSPDP party bad kumba kane ka party ka dei ka party riewlum barim tam kan dang ïai ïaleh na ka bynta ban ïakhun ïa ka hok jong ki trai muluk ki trai jaka.
Ha kane ka sngi, la plie paidbah ruh ïa ka ophis treikam ka HSPDP ha Palm Hotel bad kumjuh ruh la pynlait paidbah ïa ka jingrwai election ka party ban kyrshan ïa U Bah Primson Makdoh kum u kyrtong ka HSPDP na Umsning Constituency.
