Ïoh bat ki paidbah ïa ka kali ba kit masi beaiñ ha West Garo Hills, ujor sha ki Pulit

Shillong, Nailar, 24: Kawei ka kali Mahindra Pick-Up Van kaba don ïa u nombar AS34 C 1002 ka la shah bat ha ki paidbah ha Nidanpur ha ka shiteng sngi jong ka sngi u Blei katba ka dang kit ïa ki masi khlem ki kot ki sla kiba biang.
La ïathuh ba kane ka kali ka la kit ïa ki masi ba la thied na Jaleswar, Assam, katba ki kot ki sla ba la pyni kim shym la long satia kiba pynksan ïa ka jingkit ïa ki masi.
Kane ka la jia ha ka shnong kaba dang hap hapoh ka Phulbari Police Station, ha kaba ïa ka kopi ba ujor la phah ruh sha u Superintendent of Police ka West Garo Hills na ka bynta ban leh katkum ki kyndon aiñ.
Ki paidbah ki la dawa ba dei ban pyntreikam da kaba pyrkhing ïa ki aiñ jingïada ban khanglad ïa ka jingshalan tuh ïa ki masi.
Ka syrnot ba la ai da ka Jaleswar Go-Haat Committee ka long tang ban shu die pateng hynrei ym na ka bynta ban kit, kam don ïa ka veterinary clearance, ne ka transportation license kaba kdew hapoh ka Transport of Animals Rules, 1978, Transport of Animals on Foot Rules, 2001, bad ka Prevention of Cruelty to Animals Act, 1960, bad ka Meghalaya’s Cattle Protection and Preservation Act.
Ki bor synshar bad ki paidbah ki la pynpaw ba kane ka dei ka jingpynkheiñ ïa ki kyndon ban shalan beaiñ ïa ki mrad, kaba suba ba ka dei ka jingkhaïi tuh, kaba thmu ban shalan beaiñ bad kaba pynkheiñ lut ïa ki kyndon aiñ.
Ki paidbah ki la dawa ba dei ban rejistar ïa ka ejahar, ban kurup noh mardor ïa ka kali bad ïa ki masi bad ba dei ban pynlong ïa ka jingtohkit pyrshah ïa kiba kit ïa ki masi, ïa ki nongshalan bad ïa ki nongthied.