Shillong, Ïaïong 19: Ka khubor ba la ïoh na ki pulit la ïathuh ba u Rangbah Shnong ka shnong Bakur u la phah ka jingujor ba ha ka 15 tarik mynta u bnai ki dkhot ka VDP jong ka shnong ki la ïoh bat ïa 3 ngut ki nong Bangladeshi kiba kyrteng u Md. Sujan ba 38 snem ka rta, u Md. Sujon ba la 28 snem ka rta bad u Abdul Mannah ba la 20 snem ka rta ba la kynnoh ba ki la wanrung beaiñ shapoh u pud u sam ka ri India na ka shnong.
Ha kawei pat ka liang ki pulit ki la ïathuh ba u Pawan Kr. Mittal u la phah ka jingujor ba ha ka 21 tarik u Lber, 2025, u la shim wai ka trok jong kaba don u nombar AS-01PC-3525 kaba dei jong u Chhotu Kumar lyngba u nongtrei uba kyrteng u Pawan Kumar da kaba ai daw ban kit ïa 900 byrni ka dewbilat kaba dei jong ka M/s Hills Cement Ltd. na Umïam (RB) sha Changsari, Kamrup, Assam. Hynrei katei ka trok ka khlem poi satia sha ka jaka ba la buh tad haduh kine ki sngi. Ha ka jingtohkit la lap ba ïa kane la pyndonkam bakla da u Chhotu Kumar bad u Pawan Kumar.
Ha kawei pat ka jingjia u Tengban u la phah ka jingujor ba ha ka 12 tarik nohphai sngi jong mynta u bnai u la shem ba ki runar bym lah ban ithuh ki la tuh kawei ka Remote Radio Unit kaba shongdor T. 1.14 lak napoh ka jaka ba don u tower ha Hawakhana, Tura (WGH).
