Inter District U-19 Boys Cricket: Pynliem ka SCA ïa ka Ri-Bhoi ka East Garo Hills ïa ka South Garo Hills

Shillong, Ïaïong 25: Ka Shillong Cricket Association (B) bad ka East Garo Hills kila khur jingjop hala ki jong ki jingïalehkai jong ka lympung Inter District U-19 Boys Cricket Tournament kaba long ha ka sngi Nyngkong.
Ha ka Group A jong ka Zone 1, ka SCA (B) kala khur jingjop da kaba pynliem noh da saw wicket pyrshah ïa ka Ri-Bhoi ha ka jingïalehkai kaba long ha Jowai, katba ha ka Zone 2 ka EGH kala pynliem da 68 ron pyrshah ïa ka South Garo Hills ha ka jingïalehkai kaba long ha Tura. Da kane ka jingjop baroh ar tylli ki team ki bat kyrdan ba hakhlieh hala ki jong ki Group da kaba khur jingjop arsien na ki arsien ïakhun.
Haba phai sha ka jingïakhun kaba nyngkong, ka Ri-Bhoi kaba la jop ïa ka jingkynting pisa kala kam ban tied nyngkong hynrei ka kamai tang 64 bad hap lut baroh ki wicket ha kaba ki rangkawang bol ka SCA (B) ba kynthup ïa u Pushkar Raj u khur 3 wicket ai kamai 10 ron, u Basant Chettri 3 wicket ai kamai 15 ron bad u Angkit Tamang u khur 3 wicket ai kamai 27 ron. Tang u Reshab Subedi marwei uba kamai bun ron na bynta ka Ri-Bhoi da 23 ron.
Haba beh ïa ka ron ka SCA (B) kala duh noh hynriew tylli ki wicket hynrei watla kane ka kyhun kala mad kajuh ka jingshah pynhap wicket pynban ki 15 ron jong u Raj hitting uba neh haduh ba kut ka jingïalehkai bad ki 10 ron u Chettri uba la ïoh khur ruh ka khusnam Player-of-the-match ka kynhun kala khur ïa ka nam jop. Kiba la khur wicket na bynta ka Ri-Bhoi ki kynthup ïa u Md Siraj Ali (2/13), Bharat Gurung (2/14) bad u Vikram Marbaniang (2/14).
Ha kawei pat ka jingïalehkai, ka EGH ka kamai 184 ron (all out) ha ki 30.1 over kaba la kam ban tied nyngkong na ka jingjop ïa ka jingkynting pisa. U Kapil G Momin u kamai bun ron tam da 31 ron, katba u Jadilbirth Marak bad u Welster M Marak ki kamai mar 27 ron. Kiba la khur wicket na bynta ka SGH ki kynthup ïa u Anup Saha (3/18) bad u Sundaybirth Sangma (3/44).
Haba wan beh ïa katei ka ron, ka SGH ka khlem lah ban ïalehkai bha ha ka liang ka tied ha kaba kala duh noh hynriew wicket hadien ba kamai 56 ron, u Griksil G Marak u kamai 41 ron bad u Sunbirth M Sangma u kamai 13 ron bad ka kynhun kala shah pynhap lut baroh ki wicket bad kynjoh tang ha ki 116 ron. U Bilgrak G Sangma (Player-of-the-match ) u khur 3 wicket ai kamai 17 ron, katba u Gulgul Sangma u khur 4 wicket ai kamai 24 ron bad u Chimbara Sangma u ïoh 2 wicket ai kamai 26 ron.
Ha ka sngi Ba-ar, ka All Jaintia CA will kan ïakhun pyrshah ïa ka East Jaintia Hills ha ka Group B jong ka Zone 1. Katba ha ka Zone 2 kan bteng biang ha ka sngi Balang.